Gonzalo Caballero urxe á Xunta un plan potente de rescate á hostalería e o pequeno comercio: “Os pequenos negocios non poden seguir agardando un mes máis polas axudas directas que a Xunta anuncia pero aínda non deu”

O líder do PSdeG critica que o peche da hostalería decretado pola Xunta non levara aparellado axudas directas de xeito automático

O secretario xeral contrasta “os anuncios aínda non levados a cabo por Feijóo” coas axudas que puxeron en marcha outras comunidades dende marzo

Santiago, 7 de novembro de 2020. O secretario xeral do PSdeG, Gonzalo Caballero, urxiu hoxe á Xunta, no día no que entra en vigor o peche da hostalería en 60 concellos galegos, a “dispoñer xa” as axudas para os afectados. “Os pequenos negocios afectados polas restricións non poden seguir agardando un mes máis ser recibir axudas directas da Xunta”, advertiu.

“Hoxe vense obrigados a pechar milleiros de negocios galegos sen que a Xunta fixera nada máis que anuncios”, reprobou o líder do PSdeG, quen fixo fincapé en que “non se pode demorar máis” a aprobación dun “plan potente de rescate” aos sectores afectados polas restricións derivadas da pandemia.

De feito, Gonzalo Caballero recordou que o PSdeG leva pedindo á Xunta que poña en marcha axudas directas dende a primeira vaga da covid, do mesmo xeito que fixeron outras comunidades e tamén moitos concellos galegos.

Ademais, sinalou que o goberno de España aprobou tamén ingresos e prestacións extraordinarias para os autonómos que, no caso de Galicia, chegaron polo de agora a unhas 90.000 persoas.

“Os hostaleiros, os comerciantes, os autónomos, o sector cultural… ven as súas economías ao borde do precipicio”, evidenciou Gonzalo Caballero, quen cuestionou que “os anuncios de Feijóo chegan tarde”, máxime cando non se materializarán ata os meses seguintes.