Gonzalo Caballero reclama elevar ata o 1,5% do PIB galego a inversión en I+D+i en dous anos: “A covid evidencia a importancia de apostar pola investigación”

O líder do PSdeG chama a “corrixir eivas” para que Galicia “non perda a batalla do futuro” e avoga por incorporar 2.000 investigadores ao sistema universitario e investigador galego

O voceiro do PSdeG no Parlamento de Galicia, Gonzalo Caballero, interveu hoxe na comisión da reconstrución para defender a importancia de apostar por un modelo que priorice a investigación e a innovación. Así, reclamou á Xunta que incremente a porcentaxe de inversión en I+D+i, a fin de pasar do 0,9% actual ata o 1,5% do PIB nos vindeiros dous orzamentos.

“Se algo evidencia esta crise da covid é a importancia de apostar pola investigación”, sinalou Gonzalo Caballero trala comparecencia da voceira de InvestiGal, unha rede galega de investigadores/as, ao tempo que subliñou a capacidade deste sector para “dar respostas aos grandes retos e aos problemas do mundo no que vivimos”.

De feito, o líder do socialismo galego incidiu na necesidade de “corrixir as eivas” no que atinxe ao escaso impulso por parte da Xunta á investigación e á innovación. “Ou apostamos por unha Galicia innovadora, con compromisos concretos e avances reais, ou perderemos a batalla do futuro”, advertiu.

Nese senso, Gonzalo Caballero propuxo reducir as cargas burocráticas que lastran a realización de proxectos de investigación, desenvolver políticas que permitan atraer persoal docente e investigador a Galicia, incrementar o número contratos predoutorais e posdoutorais, dotar de estabilidade a carreira investigadora e apostar pola investigación en eidos punteiros e tamén nos específicos que resultan moi importantes para Galicia, como, por exemplo, os sectores pesqueiro e marisqueiro.

Do mesmo xeito, formulou incorporar 2.000 investigadores ao sistema universitario e investigador galego, deseñar unha nova política laboral que deixe atrás a “precariedade” actual e busque a “estabilidade” dos investigadores e aumentar os recursos destinados a proxectos de investigación que fomenten a conexión entre universidades.

E, na liña de elevar o nivel de aportación de fondos públicos á I+D+i, o secretario xeral do PSdeG sinalou que Galicia está “rezagada” neste eido, con menos inversión sobre o PIB na actualidade que en etapas anteriores. Ademáis, mentres outras comunidades avanzaron moito, quedamos rezagados: así o reflexa a comparación co norte de Portugal, así como coa media de rexións europeas e tamén das comunidades autónomas de España. “A Xunta ten que apostar por un modelo que priorice a I+D+i”, remarcou

“UN NOVO MODELO”

Así pois, Gonzalo Caballero defendeu que “é o momento de construír un novo modelo” para Galicia e ofreceu “consenso” para facelo, porque acadar que se dedique a investigación o 1,5% do PIB galego “é realizable” en dous exercicios orzamentarios.