Gonzalo Caballero reta a Feijóo a “dar instruccións aos seus deputados para que deixen de boicotear a gobernabilidade do país”

O secretario xeral sinala os “bandazos” de Feijóo, que pasa da “confrontación radical” con Pedro Sánchez e de “apoiar os pactos con Vox” a “pedir ministerios” porque “sabe que o PP ten perdidas as eleccións”

Santiago, 13 de setembro de 2019. O secretario xeral do PSdeG, Gonzalo Caballero, compareceu este venres ante os medios de comunicación para criticar a “inconsistencia” que amosa Feijóo ao falar de pactos e retoulle a “dar instrucións aos deputados do PP para que deixen de boicotear a gobernabilidade do país” se quere ter “un ápice de credibilidade”.

Deixou claro o líder dos socialistas galegos que “non hai ningunha opción de que haxa ministros dun PP entregado á ultradereita nun goberno progresista”. “Porque queremos que España siga avanzando”, recalcou, consciente de que os pactos PP-Vox “poñen en risco” a defensa dos dereitos e das liberdades.

Por iso, Gonzalo Caballero cualificou de “brinde ao sol” a “oferta á desesperada” de Feijóo; un plantexamento que “amosa o seu nivel de cinismo e reflexa que sabe que o PP ten perdidas as eleccións”.

Así pois, o máximo dirixente do PSdeG censurou os seus “bandazos”, que o levan a pasar da oposición “radical” contra o presidente do goberno e “apoiar os pactos do PP con Vox” a “pedir ministerios” ao día seguinte. “Sabe que se hai novas eleccións, haberá un novo batacazo para a dereita”, incidiu.

Neste escenario, Gonzalo Caballero recomendoulle a Feijóo que estea “á altura das circunstancias” e reclame do PP que “facilite a investidura do presidente que ganou as eleccións” e que “deixe de utilizar as institucións con fins partidistas”. Do mesmo xeito, esixiulle “responsabilidade” no relativo ás entregas a conta e que poña fin á “telenovela por capítulos” na que ten convertido a reclamación.