A Valedora constata o dano do goberno de Feijóo ao Estado Social en Galicia

A portavoz do Grupo Socialista na Comisión de Peticións ao Valedor do Pobo, Patricia Vilán, alertou hoxe do dano provocado polo goberno de Feijóo ao Estado Social de Galicia. Así o dixo na comparecencia da Valedora do Pobo no Pleno do Parlamento para presentar o informe correspondente ao ano 2018.

Vilán sinalou que as 20.807 reclamacións recollidas en 2018 céntranse na Sanidade pública, Educación e Política Social principalmente, pero tamén inclúe cuestións preliminares relativas ás eivas en vivenda pública, o transporte público e a falla de diálogo social no emprego público. Sinalou que “hai moito que traballar nas máis de 100 peticións reiteradas de información ao Goberno”, así como nas 47 advertencias de resposta urxente ás consellerías e as 131 peticións de informe reiteradas.

Vilán advertiu que o elevado número de queixas neste servizo é resultado de 9 anos de deterioro laboral e recortes en persoal e servizos por parte do goberno de Feijóo, que mantén “unha posición inamovible sobre as cuestións relevantes e desprezando as aportacións do Grupo Socialista”.

A responsable socialista instou ao goberno galego a tomar tódalas medidas posibles para mellorar as prestacións e a dotación de persoal sanitario, sinaladamente logo de que o goberno central veña de habilitar a maior convocatoria de MIR da historia. Advertiu que “non é o momento de poñer escusas” e subliñou que “a cidadanía galega merece unha sanidade pública á altura” e que o goberno galego convoque tódalas prazas que ten dispoñibles.

Sinalou ademais que a cidade de Vigo é a cidade que remite máis queixas nesta materia, sinaladamente polo repunte de protestas na cidade máis poboada de Galicia polo peche de Pediatría no Centro de Saúde de Coruxo.

Advertiu do incremento de queixas relacionadas coa vivenda pública, cando hai 13.426 solicitantes de vivenda protexida e a oferta da Xunta é “tendente a cero”, en lugar de “adoptar políticas efectivas para aumentar o parque público de vivenda”. Tamén salientou as peticións en materia de transporte público e emprego público, mentres a Xunta négase a aprobar unha Lei de Mobilidade Sustentable ou cumprir cos compromisos acadados na negociación colectiva.

Vilán reiterou, en materia de Politica Social, a necesidade de regular da Valedoría da persoa con discapacidade, ademais de sinalar que “aumentaron as queixas por atrasos na valoración da Dependencia” a pesares do anuncio da Consellería da diminución nos atrasos. Ademais, alertou de que a maior parte das recomendacións en materia de servizos sociais referíronse aos atrasos nas valoracións da discapacidade, ata o punto de que a Valedoría iniciou 7 queixas de oficio en 2019.

Algo semellante sucede coas prazas residenciais, onde a maioría das queixas fan referencia ao atraso na efectividade do servizo e á falla de información sobre as listas de espera, así como á concesión de prazas lonxe do contorno da persoa con dependencia.

A Consellería de Educación foi a segunda con máis queixas -e foi amonestada ata en 34 ocasións-, especialmente sobre a atención ao alumnado con necesidades específicas e ao agrupamento do alumnado en diferentes niveis educativos, logo da decisión do goberno de Feijóo de reducir drasticamente profesorado público.

Finalmente, apuntou ás 1.245 queixas rexistradas con relación ao medio ambiente, principalmente relacionadas coa contaminación acústica, pero tamén coa falla de control de vertidos de Augas de Galicia ou co uso excesivo de herbicidas fitosanitarios con glifosatos, con efectos negativos constatados sobre a saúde das persoas, ademais de sobre o medio ambiente.