Triunfalismo e chovinismo no discurso de Fin de Ano Feijóo

O secretario xeral do PSdeG-PSOE, Gonzalo Caballero, dixo que o discurso do presidente da Xunta “caracterizouse polo triunfalismo, a autocompracencia e o autobombo”. Lamentou que a intervención “non respondera ás inquedanzas e ás necesidades dunha cidadanía que ve como Galicia perde peso demográfico e pulo económico e industrial e sofre os recortes nos servizos públicos”.

O discurso de Feijóo “esquece os os problemas da Galicia real para recrear unha situación idílica que non é na que viven as familias galegas”. Fronte ao triunfalismo e o chovinismo do discurso de Feijóo, dixo, “reivindicamos realismo e solucións aos problemas dunha Galicia que vai a peor”.

Sinala que “o balance economico que fai o presidente da Xunta esquece o conxunto de dificultades que padece un país con baixos salarios e pensións, recortes nos servizos públicos, maior exclusión e unha preocupante desigualdade”. O mesmo que sofre “longas listas de espera na sanidade pública, abandono do medio rural e poucas posibilidades de futuro para a xente nova, entre outras”.

Engadiu que “as galegas e os galegos non nos podemos ver reflexados nun discurso oficialista que non representa á realidade do país, que falla no balance e que non amosa estratexia”. “A falla de atención –engade- ás prioridades sociais das galegas e os galegos no discurso fainos valorar que implica un enfoque errado”.

Terrorismo incendiario

Asimesmo considera que “centrar o grave problema dos incendios que sufriu Galicia en 2017 nun suposto terrorismo incendiario e na valoración da resposta cidadá implica eliminar calquera referencia autocrítica ao fracaso da política forestal e de incompetencia na prevención e loita contra incendios”. Sinala que “é necesario partir dunha análise máis precisa que implique responsabilidades e cambios nas políticas públicas do goberno galego”.

Finalmente, sinala que “o financiamento autonómico ten que garantir o acceso de tódolos cidadáns aos servizos públicos, con independencia dos territorios dentro do Estado”. Neste punto, advirte que “os socialistas galegos amosamos a nosa disposición a traballar en 2018 para que Galicia non perda recursos nin posición relativa no financiamento autonómico”.