O Grupo Socialista esíxelle á Xunta que explique en que gastou os 92 millóns dos Fondos Covid destinados a Educación

Luís Álvarez pide á Xunta que explique as partidas orzamentarias ás que destinou os fondos do Estado para “gasto educativo”, que pediu gastar “con liberdade”

O portavoz de Educación do Grupo Socialista, Luís Álvarez, esixiu á Xunta, a través dunha batería de iniciativas presentadas no Parlamento, que explique en que gastou os 92 millóns dos Fondos Covid-19 destinados a educación. Así, Álvarez instou ao goberno galego a explicar cantos cartos dedicou exclusivamente a “gasto educativo”, e a definir as partidas destinadas tanto aos centros públicos como aos concertados.

O responsable socialista destacou que o Ministerio de Educación e Formación Profesional, “respectando a capacidade dos gobernos das comunidades autónomas, fixo fincapé en que os Fondos Covid-19 correspondentes ao tramo 3”, dotados con máis de 2.000 millóns de euros en todo o Estado, dos que 92 millóns lle corresponderon a Galicia, tiñan “como finalidade os gastos educativos, poñendo como exemplo a contratación de profesorado, a habilitación de novos espazos ou outras necesidades ás que se debe facer fronte”.

Pese a estas consideracións, Álvarez lamentou que “o presidente da Xunta pediu liberdade para dedicar eses fondos ao que considerase o propio goberno galego, argumentando, segundo saíu publicado nalgúns medios, que son ‘maiores de idade’ para decidir a que programas destinar ditos fondos”. Neste marco, o responsable socialista instou á Consellería de Educación a explicar “que cantidade dedicou exclusivamente a gasto educativo; cantos profesores se contrataron; ou canto diñeiro se destinou a centros públicos e canto a centros concertados”.

Por último, Álvarez puxo en valor esta “medida excepcional” tomada polo goberno do Estado, quen considerou “o papel excepcionalmente relevante que desempeñan as comunidades autónomas na prestación de servizos públicos como a educación” á hora de dotar a partida de educación dos Fondos Covid-19.