Noelia Otero alerta de que a falla de investimento da CRTVG está a provocar importantes eivas nas retransmisións

A portavoz do Grupo Socialista na Comisión da CRTVG, Noelia Otero, alertou hoxe de que a aposta da dirección da CRTVG polo recorte de custes está detrás das importantes eivas nas retransmisións da canle autonómica. Otero presentou no Parlamento unha pregunta oral polas perdas de sinal de entre 2 e 8 minutos, algo “televisitamente inaceptable”, na retransmisión dun partido de balonmán o pasado 13 de novembro.

Otero levou ao Parlamento a denuncia do Comité Intercentros, que apunta ao “nulo investimento en sistemas para as retransmisións” como motivo da caída na calidade das retransmisións. Neste caso concreto, segundo os traballadores a CRTVG decidiu cubrir a retransmisión en directo dun partido entre o Frigoríficos do Morrazo e o Barcelona, vixente campión de Europa de balonmán, con mochila telefónica no lugar do sistema vía satélite, máis calidade e máis caro.

O sistema de mochila é empregado habitualmente para conexións curtas, pero non para unha retransmisión dun evento deportivo, cando a cobertura varía e non soporta a estabilidade precisa para tanto tempo de emisión continuado. Durante o dito partido, explica Otero, as perdas de conexión foron continuas, “comprometendo a imaxe da Corporación, xa que o sinal era recibido por outras canles autonómicas”.

Otero sinala que “despois da posta en marcha da plataforma dixital –da CRTVG- as unidades móbiles non se actualizaron e seguen tendo tecnoloxía de definición estándar –SD-, inservible para as novas retransmisións en alta definición –HD-”, o que “a estas alturas tampouco se entende”. Apunta que “o barato sae caro, cunha retransmisión longa con moitas papeletas para sufrir erros polo sistema escollido, como efectivamente adoita suceder”.

Lembrou o episodio padecido en novembro de 2018, cando durante máis de 3 horas tiveron que emitir vídeos enlatados pola imposibilidade de emitir espazos en directo, habilitando un plató de urxencia para os informativos. A parlamentaria socialista considera “inaceptables” estes exemplos, e defendeu uns “medios públicos de calidade”, que pasa tamén pola estabilidade do persoal, a proximidade, pluralidade e calidade nos programas e tamén dos medios técnicos.

Sen embargo, a dirección do ente ten decidido manter ao persoal en precario, eliminado as desconexións locais, omitindo da grella a información das administracións locais, e mesmo entorpecendo a pluralidade e a calidade dos programas, como pon de manifesto a plataforma Defende a Galega nos seus venres negros. Advirte que dez anos despois da aprobación da Lei dos medios públicos de comunicación “seguimos sen saber nada do estatuto ou do Consello de Informativos”.