Leticia Gallego reclama o arranxo da PO-313 Moaña-Marín e a construción dunha senda peonil e ciclista na vía

Lamenta a “discriminación” á que está sometida á veciñanza de Moaña por parte da Xunta ao “non atender as súas demandas”

A deputada socialista Leticia Gallego visitou hoxe Moaña, na compañía da súa tenente de alcalde, Marta Freire, para anunciar unha batería de iniciativas que o PSdeG vén de presentar na Cámara galega.

Dende a PO-313, a responsable socialista urxiu á Xunta o arranxo das beirarrúas da estrada principal que une os concellos de Marín e Moaña, unha vez que ten “un problema de seguridade e accesibilidade” e precisa, entre outras cuestións, de pasos de peóns “que eviten o efecto barreira dentro dos barrios”, así como medidas que permitan a redución da velocidade, tal e como prescribe o novo regulamento de circulación.

Noutro orde de cousas, a voceira socialista pediu a construción dunha senda peonil e ciclista pola mesma vía, tal e como xa está aprobado no Plan de Mobilidade Sustentable Municipal de Moaña, onde se contempla a súa realización “como mínimo” dende o aparcadoiro de Broullón ata a rotonda Porta do Almacén. Esta actuación, sinalou, é unha “demanda histórica” que “conta co respaldo de varias asociacións veciñais da vila”.

A “DISCRIMINACIÓN” DA XUNTA SEGUNDO A COR POLÍTICA

“A Xunta de Galicia discrimina á veciñanza de Moaña ao non atender as súas demandas”, alertou a dirixente socialista, logo de coñecer o “desleixo” do goberno galego co respecto municipio que quedou plasmado tamén no voto en contra do PP á emenda elaborada polo PSdeG aos orzamentos da Xunta de 2021 onde se contemplaba a realización destas dúas actuacións para a vila do Morrazo.

Así, a responsable socialista lembrou que “Feijóo ten que gobernar para todos os galegos e galegas”, xa que “toda a cidadanía merece boas infraestruturas”.

“Os 313 municipios de Galicia merecen que a Axencia Galega de Infraestruturas invista neles e non como acontece agora”, subliñou Gallego, logo de saber que o goberno galego gastou “máis de 14 millóns de euros en concellos gobernados polo PP” fronte a un investimento de “280.000 euros en concellos dirixidos por gobernos socialistas”.