Formoso reivindica ao PSdeG como alternativa de goberno fronte a unha Xunta “ausente” nun “momento crítico para Galicia”

Sinala que os socialistas galegos queren “liderar a posibilidade de cambio demostrando que hai outra forma de gobernar”

O líder dos socialistas galegos participa na Feira do Queixo San Simón da Costa en Vilalba para trasladar “o apoio ao sector leiteiro e toda a cadea agroalimentaria galega”

O secretario xeral do PSdeG, Valentín González Formoso, presentou hoxe aos socialistas galegos como alternativa de goberno a unha Xunta “ausente, máis preocupada pola sucesión de Feijóo que polos problemas reais do país” precisamente nun “momento crítico para Galicia”. Así o dixo na súa visita á Feira do Queixo San Simón da Costa, hoxe en Vilalba.

Formoso sinalou que os socialistas galegos queren “liderar a posibilidade de cambio de goberno” demostrando que hai “outra forma de gobernar”. Salientou que o PSdeG “non é o partido das pancartas, nin o partido do NON, nin o da preocupación pola sucesión do seu líder”.

Aludiu aos socialistas galegos como un partido con equipo, proxecto e ampla experiencia de xestión que a cidadanía coñece e valora, unha alternativa que ofrece estabilidade, rigor e seriedade e sentido de país por parte dun partido activo, renovado e preparado para gobernar.

Presentou un “partido afianzado nas institución”, que demostra unha alternativa “de goberno”, como demostra a xestión nos concellos de Santiago, Ferrol, Vigo, Lugo ou A Coruña, así como en Vilalba, un “lugar simbólico” que apostou polo cambio logo de 30 anos de goberno do PP e que demostra o que o PSdeG “pode facer dende as institucións”.

Contrapuxo a ausencia do PP e do goberno galego coa iniciativa socialista para “lanzar un decálogo básico” de medidas para que “a cidadanía galega poida entender cales son as nosas prioridades”. Unha delas, resumiu, “é o apoio ao papel estratéxico do sector agroalimentario, que supón o 2 por cento do PIB de Galicia, e que produce máis da metade do leite de todo o Estado”.

Así o dixo dende Vilalba, conde acompañou á alcaldesa, a socialista Elba Veleiro, e cargos públicos e orgánicos do PSdeG de Lugo, na Feira do Queixo San Simón da Costa para “manifestar o apoio do PSdeG e a lectura que fai do sector leiteiro e de toda a cadea agroalimentaria do país como un sector estratéxico”.