Besteiro reclama avances cara á igualdade real poñendo o acento no “moito que queda por avanzar” para superar a fenda salarial e acadar a paridade

Encabeza a delegación socialista na manifestación do 8M en Vigo, onde chama a acadar un gran pacto pola corresponsabilidade nos coidados

O candidato electo do PSdeG, José Ramón Gómez Besteiro, lanzou hoxe unha proposta de acordo político para dedicar o 1 por cento do Orzamento da Xunta ás políticas de Igualdade “pero co ollo posto no 2 por cento”. Besteiro participou na manifestación convocada en Vigo con motivo do Día Internacional da Muller xunto con máis de 20.000 mulleres e homes que ateigaron as rúas da cidade a pesares do mal tempo.

Gómez Besteiro emprazou a acadar un gran pacto pola corresponsabilidade nos coidados, que é o eixo da campaña socialista en redes con motivo do 8M deste ano, e lembrou que a pesares dos logros acadados aínda “queda moito por avanzar para acadar a igualdade real”. Puxo así o acento na fenda salarial pola que as mulleres perciben un 20 por cento menos de salario que os homes, ou a falla de paridade.

O responsable socialista encabezou a delegación socialista na manifestación de hoxe xunto co alcalde da cidade, Abel Caballero, a presidenta do PSdeG, Carmela Silva, ou a secretaria de Igualdade do PSdeG, Silvia Fraga, a concelleira e parlamentaria electa, Elena Espinosa, ou o deputado e secretario provincial, David Regades.

O alcalde da cidade, Abel Caballero, subliñou que a mobilización cidadá fai que “hoxe sexa un gran día” para o movemento do feminismo e da igualdade, que “non hai quen o pare”. Caballero aludiu directamente á oposición de Vox a esta reivindicación mentres “o PP os branquea pactando con eles, e iso tamén é parte do 8M”.

A presidenta do PSdeG, Carmela Silva, abundou no argumento a cualifica ao PP de “cómplices” do partido da extrema dereita e do seu negacionismo da violencia machista e das desigualdades. Apuntou que a pesares do mal tempo “as mulleres, acompañadas dos homes que cren na igualdade, estamos nas rúas a defender os dereitos da metade do mundo pola transformación da estrutura machista que hai na sociedade”.