Pablo Arangüena pregúntalle á Xunta “se queren competir con Vox en autoritarismo” ao impoñer o pasaporte covid na hostalería sen autorización xudicial previa

O viceportavoz do Grupo Socialista, Pablo Arangüena, preguntou hoxe se a Xunta “quere competir con Vox en autoritarismo” logo de obrigar á hostalería a esixir un certificado de vacinación durante 20 días sen ter recabado antes a obrigada autorización xudicial. Arangüena presentou unha pregunta oral na que denunciou que “lles dea igual restrinxir dereitos fundamentais sen respectar a legalidade”.

Arangüena explicou que a sentenza do Tribunal Supremo feita pública onte “non lles deu a razón” no canto a que “aplicaron unha medida restritiva de dereitos durante 20 días sen pedir autorización xudicial e xerando caos polo camiño”. Así o sinala a dita sentenza, dixo, na páxina 10, fundamento xurídico sexto, onde “sinala que vostedes tiñan que ter pedido autorización xudicial”.

O responsable socialista cualificou de “inaudito” que “unha administración pública como a Xunta infrinxa a legalidade desta forma sementando o caso polo camiño”. Advertiu que “temémonos que Feijóo estea tan preocupado pola propaganda que perde o rumbo nunha situación que esixe medidas sanitarias, pero tamén respecto ás leis e aos dereitos da cidadanía, porque sen lei non hai democracia”.

Desimplantar o implantado

Lembrou as acusacións de Feijóo sinalando “aquelo de que o estado de alarma xera alarma” pero, puntualizou, “quen xera alarma é o presidente da Xunta, quebrantando as leis sen despeitearse, e implantando medidas sen autorización xudicial, que logo ten que desimplantar sementando caos”. Advertiu que “alguén debera asumir responsabilidades, pero a Xunta nin sequera deu a máis mínima explicación para a súa ilegalidade”.

Engadiu que “se ao presidente da Xunta non lle gustan as leis, o que ten que facer é dedicarse a outra cousa, pero non pode decidir unilateralmente que restrinxe dereitos fundamentais sen autorización xudicial sementando o caos na hostalería, cando durante o confinamento criticaba precisamente a restrición de dereitos”.