Inacción da Xunta fronte ás empresas responsables dos apagóns eléctricos

A portavoz de Industria do Grupo Socialista, Begoña Rodríguez Rumbo, lamento hoxe a “falla de acción” do goberno galego para garantir que as empresas de subministro eléctrico cumpran coas súas obrigas de calidade no servizo. A responsable socialista presentou unha pregunta oral en Comisión polos apagóns provocados polo temporal do 19 ao 21 de decembro, que afectaron a zonas xestionadas por Naturgy.

Rodríguez Rumbo lembrou que esta empresa, que “comparte accionariado coa Xunta en varias entidades”, é a mesma que “se beneficia dos nosos recursos naturais” e que quere adiantar o peche da central térmica de Meirama a 2020. Apunta que “xa que a empresa non parece ser corresponsable co territorio, debe ser o goberno galego quen lle faga saber do seu compromiso co país no que está a explotar recursos”.

Reivindicou así a toma de medidas respecto das eléctricas que tardaron “moitas horas” en restablecer o subministro, ademais de habilitar axudas para minimizar os danos da poboación, especialmente no rural. Sinalou así ás fallas no mantemento das redes eléctricas como a causa duns apagóns que en casos chegaron ata as 72 horas.

A parlamentaria socialista reclamoulle ao goberno galego que informe en sede parlamentaria das conclusións do expediente que ten anunciado contra estas empresas, e instouno a ampliar as inspeccións técnicas á rede dos concellos que sufriron cortes de máis de 6 horas.

Naqueles días, dixo, segundo os datos ofrecidos hoxe pola Xunta víronse afectadas 424.000 persoas –o que supón o 16 por cento da poboación galega- por uns apagóns de 3 horas de media, mentres o 3 por cento da poboación sufriu cortes de entre 48 e 72 horas.

Lembrou que de acordo co Ministerio de Industria “Galicia ten hoxe peor subministro que hai un lustro”, cun 48 por cento máis de apagóns en 2018, mentres o rural cuadriplica os cortes de luz do entorno urbano.