O PP pecha a porta a consensuar modificacións no sistema educativo público

O portavoz de Educación do Grupo Socialista, Luis Álvarez, lamentou hoxe o veto do PP a unha proposta socialista para pedirlle á Xunta que convoque aos actores da comunidade educativa co obxectivo de consensuar as reformas necesarias para “garantir de forma efectiva a igualdade educativa”. Así o dixo no debate dunha moción socialista presentada no Pleno do Parlamento de Galicia que foi rexeitada polo PP.

Álvarez alertou das consecuencias dos recortes aplicados polo goberno de Feijóo, que presenta “cada curso unha cadea de peches, que por si mesmos non son especialmente graves, pero cando se suman son algo importante e constitúen unha cadea de microsismos”. Advertiu de que a falla de criterio do goberno galego está a producir serias desigualdades entre os alumnos dos centros máis poboados e os que teñen menos demanda ou casos de desatención.

Sinalou á agrupación de alumnos, perda de especialidades ou falla de atención a escolares con necesidades especiais que se ten producido en centros como Brión, Portomarín, Ponteareas, Cariño, Covelo ou Salceda de Caselas este mesmo ano. Lembrou a rectificación do goberno logo de dicirlles aos pais dun neno con necesidades especiais severas en Oleiros que, ante a negativa de ofrecerlle un coidador, “ou non mandaran ao neno a clase ou foran os pais a atendelo”.

O responsable socialista explicou que estas situacións “non é o que merece a Galicia do século XXI”, e reivindicou consenso para adoptar as necesarias modificacións na rede educativa “evitando tensións innecesarias na comunidade educativa”. Explicou a realidade actual do sistema educativa, que en apenas 6 anos perdeu 6.500 alumnos –o equivalente a 216 aulas ou 18 institutos de Secundaria- e este ano ten 2.132 docentes menos que en 2009.

Advertiu que a situación actual, con máis áreas de materias, provoca “máis desigualdade” entre centros por canto “aqueles que teñen máis alumnos teñen máis capacidade de ofertar materias”. Mentres hai “máis etiquetas –plurilingües, pluribachs, bacharelato de excelencia, etc.-, tamén temos cada vez menos pequenas escolas que atendan aos nosos pequenos e pequenas”, engadiu, polo constante peche de escolas unitarias.