O PP impide constituír unha Comisión de Investigación sobre os 159 millóns de fondos covid que a Xunta desviou de sanidade en 2020

Julio Torrado esixe unha explicación política sobre a xestión dos fondos en plena pandemia que denunciou o Consello de Contas

O portavoz de Sanidade do Grupo Socialista, Julio Torrado, lamentou hoxe o veto do PP a constituír unha Comisión de Investigación para explicar a que destinou a Xunta os 159 millóns de euros de fondos covid enviados polo Estado en 2020 e desviados polo goberno galego sen explicación. Torrado presentou unha iniciativa no Pleno do Parlamento para reclamar a investigación, pero que foi rexeitada polo PP.

Torrado reclamou “saber en que se gastaron” os 159 millóns de euros logo de que o Consello de Contas alertara da desaparición desta partida da conta xeral da Xunta correspondente a 2020. Daquela, o estado enviara 735 millóns de euros de fondos covid, dos que 418 correspondían a fondos sanitarios, e o goberno galego “xustificou 259 millóns de euros, pero hai 159 que non están, non aparecen nas contas e non foron investidos en nada que fora sanidade”.

O responsable socialista preguntou “que había máis importante que a pandemia” para gastar estas partidas en cuestións non sanitarias. Advertiu que malia que a Consellería “derivou non se sabe onde” os 159 millóns de euros, o mesmo ano fixo o “cambalache” e a “chapuzada” de asumir 344 millóns de euros de outras consellerías, e deixou outros 300 millóns en obras sen gastar para cubrir pagos sanitarios.

Alertou de que “semella que o control económico da Consellería de Sanidade é de todo menos limpo”, cando facían desaparecer 159 millóns de euros no mesmo ano no que lle retiraron cartos á consellería do Mar ou de Educación para cubrir gastos sanitarios. Reclamou que “non ocorra como cos cartos de Educación”, que empregou os fondos covid para cambiar cubertas de edificios educativos, como si que figura na conta xeral de 2020.

Lembrou a comparecencia da directora xeral de Orzamentos en Comisión Parlamentaria, onde chegou a recoñecer que as partidas “non foran a sanidade nin a educación”, senón que “empezou a falar de pagos de facturas e amortización de débeda”. Reclamoulle ao goberno galego que explique se amortizaron débeda co gasto sanitario, e advertiu que “cando alguén pasa 6 e 7 veces sen explicar é que realmente hai un problema con eses cartos”.

Julio Torrado aludiu á negativa reiterada do PP e do goberno galego a dar conta do destino destes 159 millóns de euros, e criticou que “cando alguén debe un euro ten un problema, pero semella que cando debe un millón de euros o problema o ten o outro”.

Afeoulle ao PP que aplaudiran ao conselleiro que presumira de opacidade no Pleno do Parlamento, onde replicou que “pode preguntar o que queira, que non vai conseguir resposta”, polo que Torrado sinalou que “considerarán que poden dar clase, pero hai algúns tipos de clase que non se dan: téñense ou non se teñen”.