Noa Díaz reclámalle á Xunta un bono cultural con “maior tino e sentidiño” para garantir que favoreza o consumo de cultura galega

A portavoz de Cultura do Grupo Socialista, Noa Díaz, reclamoulle hoxe á Xunta que recupere o Bono Cultural de impulso ao consumo cultural galego, pero desta volta con “maior tino e sentidiño” para garantir que cumpra o seu obxectivo. Díaz presentou unha pregunta oral ao conselleiro de Cultura no Pleno do Parlamento celebrado hoxe, na que reclamou “unha rigorosa avaliación dos efectos” desta iniciativa sobre a cultura galega.

A parlamentaria socialista propuxo que “avalíen os resultados” do bono desconto da pasada campaña de Nadal, para “afinar na selección dos produtos e establecementos que se adhiren así como nos tempos”. Alertou “para que non se converta tanto nunha campaña estacional de Nadal como nun auténtico instrumento que favoreza o consumo cultural do noso país e, sobre todo, da nosa cultura”.

Noa Díaz lembra que a posta en marcha do bono desconto da Xunta foi acompañada de “copiosas críticas ao bono cultural Xente Nova do Estado” que, ao igual que en Francia ou Italia, destina 400 euros para que rapaces e rapazas de 18 anos dediquen ao consumo de cultura. Sinala que o 80 por cento destas axudas nos países que dispoñen del foron destinados á compra de libros, en contraste co “desleixo da Xunta” para co sector.

Mentres outras comunidades autónomas se sumaban á iniciativa poñendo en marcha propostas semellantes, a Xunta se despachaba con críticas acusándoo de “discriminatorio”. Reclamoulle que “sexamos serios e responsables e, lonxe de confrontar de novo co Estado cando pinta dunha cor distinta á azul, por unha vez adopten unha postura construtiva e colaboradora e convoquen de novo o bono pero desta volta complementario ao estatal”.

A parlamentaria socialista considera “oportuna” a medida, pero reclamou “unha rigorosa avaliación dos efectos que tivo sobre a nosa cultura, en especial sobre os produtos culturais galegos, e en que medida axudou a crear novos públicos e fortaleceu todo o sector”. Mesmo recomendoulle ao conselleiro que “consulten vostedes ao sector para comprobar se ese bono desconto tivo os efectos agardados”.