Noa Díaz reclámalle á Xunta que repoña as paradas de bus escolar do CEIP Felipe Castro de Noia na Praza Marqués de Monroy e na Rúa Vizconde de San Alberto

A parlamentaria socialista Noa Díaz reclamoulle hoxe ao goberno galego que repoña as dúas paradas do bus escolar do CEIP Felipe Castro de Noia que vén de suprimir en plena pandemia. Díaz presentou unha pregunta oral na Comisión de Educación sobre a supresión das paradas de ida na Praza Marqués de Monroy e de volta na rúa Vizconde San Alberto, na liña 3 do transporte escolar desta vila.

Díaz afeoulle á Xunta a supresión destas paradas “cando existen prazas vacantes no autobús e, ademais, en absoluto supoñen un desvío na ruta do transporte”. Reclamoulle ao goberno galego que atenda a demanda das familias precisamente nun ano no que “se trataba de dar respostas e solucionarlles os problemas, evitando complicarlles as cousas aínda máis”.

A parlamentaria socialista sinala que, malia que estas paradas non formaban parte da planificación oficial, si que se estaban a realizar de maneira excepcional dende hai anos. Puntualizou que ademais a Consellería de Educación “autoriza estas paradas ou casos excepcionais nas instrucións recollidas no protocolo covid – 19, publicado o 31 de agosto”.

Noa Díaz sinala que o acceso ao centro “é complicado, xa que presenta unha costa moi empinada que dificulta que as persoas maiores acheguen ao alumnado, o que se agrava máis se temos en conta a obriga de empregar máscara de protección”.

Considera “ilóxico que en tempos de pandemia, a Consellería de Educación decida aplicar a normativa da maneira máis restritiva posible e anule determinadas paradas que sen dúbida lle facilitaban a vida ás familias”. A normativa do servizo de transporte escolar limítao ao alumnado que viva a máis de 2 quilómetros do centro educativo, se ben “existen moitas novas necesidades que merecerían unha revisión pausada das rutas”.