Gonzalo Caballero contrapón “o compromiso social” dos orzamentos estatais coa “falta de proxecto” de Feijóo

O secretario xeral subliña que a Consellería de Sanidade “non está á altura das circunstancias” tras unha nova rectificación das súas políticas

Santiago, 26 de outubro de 2018. O secretario xeral do PSdeG, Gonzalo Caballero, puxo en valor este venres o proxecto de orzamentos presentado polo goberno presidido por Pedro Sánchez, á vista do “compromiso social” que reflexan e dos “avances” que introducen.

En concreto, o líder dos socialistas galegos destacou as melloras nas pensións, na sanidade, na educación, na dependencia e no emprego, con cuestións específicas como a subida do salario mínimo interprofesional, a retirada dos copagos, a formulación dun ingreso mínimo vital ou a universalización da educación ata os tres anos de idade.

A iso sumou o compromiso coas mulleres do goberno socialista, a través da financiación do pacto de Estado contra a violencia de xénero e a equiparación dos permisos de maternidade e paternidade.

Con estes orzamentos “reais” que xa teñen recibido o visto bo das institucións europeas, Gonzalo Caballero explicou non só se permite ás familias españolas “pasar páxina” dos recortes postos en marcha durante a etapa de goberno de Mariano Rajoy, senón que tamén se atenden “as dificultades específicas” que existen en Galicia e ás que non está a dar resposta o goberno da Xunta.

Por tanto, o secretario xeral do PSdeG esixiu á dereita que non bloquee a tramitación duns orzamentos concibidos para que “a recuperación económica chegue ás familias” e que dan “un impulso fundamental” á axenda social.

“FALTA DE PROXECTO” PARA GALICIA

Sobre todo, como dixo, á vista de que as contas presentadas pola Xunta amosan “a falta de proxecto e de impulso” de Feijóo, cuxa etapa “agoniza sen novas iniciativas”.

As únicas melloras sociais, sinalou Gonzalo Caballero, son as que veñen dadas por partidas finalistas que proceden do Estado, como as axudas para combater a violencia de xénero ou os fondos para financiar a dependencia.

Polo demais, a “rectificación” do seu intento de crear pediatras de área amosa que a Consellería de Sanidade “non está a altura das circunstancias”.