Carmen Rodríguez Dacosta desmonta as “trampas” e “a falsa propaganda de Feijoo” para falsear os datos reais do paro en Galicia

A parlamentaria do PSdeG denuncia que a eliminación da renovación automática da demanda de emprego deu de baixa máis de 88.000 demandantes no primeiro semestre do ano cando, en realidade, non atoparan traballo

A deputada socialista Carmen Rodríguez Dacosta desmontou hoxe as “trampas” que estivo a facer o goberno galego durante o primeiro semestre do ano para “falsear a realidade” dos datos do desemprego en Galicia.

Así, a parlamentaria do PSdeG puxo en evidencia que a Xunta decidiu “de maneira unilateral” o pasado mes de xaneiro non continuar coa renovación automática da demanda que se aplicaba dende mediados de marzo de 2020 en todas as comunidades autónomas por mor da pandemia.

Por este motivo, “nos seis primeiros do ano foron dadas de baixa en total 88.514 persoas demandantes”, o que lle permitiu á Xunta “conseguir uns aparentes bos resultados con mentiras e vantaxismo”. A parlamentaria do PSdeG sinalou a realidade é que “os demandantes de emprego en Galicia temeron acudir ás oficinas de emprego e que a medida da Xunta acabou expulsando das listas do paro a moitos deles, pero non porque atoparan traballo”.

Esta situación mudou no mes de setembro cando xa todas as comunidades, agás Cantabria e a Comunidade Valenciana, eliminaran a renovación automática. Neste escenario, “é cando Galicia se sitúa entre as cinco autonomías nas que sube o paro nun mes de caída récord en España” e cando “aumentan as demandas de non ocupados nun 1,3% fronte a diminución media do Estado nun 2,4%”. En consecuencia, cando todas as comunidades están nunha situación similar, os resultados de Galicia “son dos peores de España”.

Por iso, Carmen Rodríguez Dacosta acusou á directora xeral de Formación e Colocación de mentir, un feito que cualificou de “moi grave” e ante o que, “se aínda lle queda un mínimo de dignidade, debería abandonar as súas responsabilidades políticas”.

Na súa análise, Carmen Rodríguez Dacosta revelou o diferentes que terían sido os datos  de desemprego en Galicia se non se estivesen a producir esas baixas por non renovación. En xaneiro foron 18.208, en febreiro 18.186, en marzo 5.734, en abril 29.201 en maio 9.713 e en xuño 7.472. Así, só por un exemplo, se se eliminan as baixas por non renovación, no mes de xaneiro as demandas de non ocupados aumentarían un 6,6% en relación co mes anterior, fronte a unha media de incremento no Estado do 3,6%. Por contra, ese mes, como nos seguintes, a Xunta falou de baixada do paro.

Esta circunstancia non só supón unha trampa para falsear os datos de paro senón que ademais penaliza aos afectados, xa que perden a antigüidade da inscrición na Oficina de Emprego. Ao fío disto, Carmen Rodríguez Dacosta reclamoulle ao goberno galego que consulte cos afectados pola non renovación -e que non estean na actualidade de alta- a súa vontade dunha nova inscrición manténdolles a antigüidade que tiñan no momento de darlles de baixa.

Tamén lle esixiu á Xunta que lles recupere a antigüidade que tiñan no momento de darlles de baixa a aqueles que volveron a inscribirse no Servizo Público de Emprego de Galicia. Así mesmo, tamén insta a solicitarlle ao SEPE a actualización das estatísticas de emprego nas que se reflexara as baixas por non renovación destas demandas.

En paralelo, Carmen Rodríguez Dacosta solicitoulle á Xunta de Galicia unha mellor dotación de recursos humanos e materiais do Servizo Público de Emprego de Galicia. O obxectivo é que o Servizo Público de Emprego de Galicia chegue a tramitar nos próximos seis meses as mesmas ofertas que a media estatal e que no próximo ano se sitúe entre a media das cinco comunidades que teñen un maior volume de ofertas en relación coas colocacións.

De maneira complementaria, o PSdeG reclamou un impulso para as políticas activas de emprego, necesarias para acabar coas altas cifras de paro -especialmente de  mulleres, mozos e parados de longa duración- e coa precariedade que, “de maneira estrutural, reina no noso mercado laboral”. Nesta liña, Carmen Rodríguez Dacosta avogou por incentivar a contratación indefinida e os contratos de remuda indefinidos, así como un plan de apoio ás persoas traballadoras autónomas .