Begoña Rodríguez Rumbo responsabiliza á Xunta da “nefasta e inexistente” planificación económica e xestión industrial de Galicia na última década

Esíxelle ao conselleiro de Economía e Industria “menos pico e máis pala” para dar conta do destino dos 2.300 millóns de euros de fondos Next Generation recibidos por Galicia

A viceportavoz do Grupo Socialista, Begoña Rodríguez Rumbo, criticou hoxe a “nefasta e inexistente planificación económica e xestión industrial” por parte da Xunta de Galicia durante a última década. A responsable socialista sinalou ao conselleiro de Economía e Industria na súa comparecencia no Pleno do Parlamento de hoxe, e esixiulle “menos pico e máis pala”.

“Temos un goberno incompetente na planificación económica, incapaz na xestión industrial e sen proxecto de país”, dixo logo de lembrar que a Xunta de Galicia posúa competencias exclusivas no fomento e planificación da actividade económica e industrial. Criticou que a pesares de contar con tódalas ferramentas, “dedican tódolos seus esforzos a confrontar e non a xestionar e executar os fondos dos que dispoñen”.

Uns fondos que ademais son inxentes grazas aos 2.300 millóns de euros dos que dispón Galicia a través dos Fondos Next Generation da UE para “recuperarnos das consecuencias da pandemia e da crise xerada pola invasión de Putin a Ucraína”. Sinalou que a Xunta ten a obriga de xestionar estes fondos, e preguntou, citando a expresión empregada polo propio Feijóo, se “estanse forrando cos fondos comunitarios achegados polo goberno”.

Lembrou que o goberno galego tense negado sistematicamente a todas e cada unha das medidas aprobadas polo goberno de Pedro Sánchez dende a chegada da pandemia dirixidas a que “ninguén quede atrás”. Afeoulles así que se opuxeran aos Ertes, ao Ingreso Mínimo Vital, o incremento do SMI, ou das axudas ás familias e pemes.

O mesmo goberno, engadiu, que segundo o Consello de Contas deixou de executar no peor da pandemia 159 millóns de fondos covid para sanidade e 42,5 millóns procedentes do Fondo de Compensación Interterritorial. Esixiulles que “traballen, deixen a publicidade, a propaganda e a confrontación” e asuman a xestión das súas competencias exclusivas en materia de economía e industria.