A viceportavoz do Grupo Socialista, Paloma Castro, reclamoulle hoxe á Xunta que remate cos “privilexios horarios” e a “maior laxitude” nas restricións que lles aplica aos locais de xogo e apostas”. A responsable socialista presentou unha pregunta oral en Comisión parlamentaria na que sinalou que a “suavidade” do Goberno galego ten con estes locais expón á poboación máis nova a condutas aditivas e provoca competencia desleal co resto da hostalería.

Paloma Castro sinalou que “agardamos que teñan en conta o perigo que supón manter unhas medidas máis laxas para este tipo de locais, sinaladamente neste posible relaxamento das restricións que anuncio Feijóo para a próxima semana”. Acusou ao goberno galego de “botar balóns fora” sinalando ao Goberno de España cando a Comunidade Autónoma é a encargada de aplicar as directrices con “precisión e concreción”.

Castro lembrou que, se ben na primeira e segunda ondas a Xunta fixo dos locais de xogo e apostas “os after da pandemia” ao ser os únicos que podían permanecer abertos, na terceira onda “foron máis sutís” evitando recoñecer os seus privilexios horarios. Estes privilexios seguían presentes no DOG, malia o que nin o conselleiro de Sanidade nin o presidente da Xunta comunicaron publicamente esta excepción.

Así, explicou, cando a hostalería permanecía pechada dende as 18,00 na noite de Fin de Ano, os locais de xogo puideron permanecer abertos ata as 23,00 horas en 39 municipios. E todo isto, sinalou, logo de que o propio vicepresidente primeiro da Xunta, nun encontro coa Asociación Galega de Empresas Operadoras, integrada por compañías tragaperras e salóns recreativos, felicitara publicamente ao sector do xogo por cumprir coas medidas.

A responsable socialista instou ao goberno galego a “rematar coa súa conivencia e ambigüidade” co sector e “presenten unha Lei de Xogo de Galicia que ofreza tódalas garantías cara á cidadanía, e que sexa de carácter restritivos polos riscos que entraña esta actividade”. Ademais, reclamou que a acompañen con “políticas de prevención e sensibilización”, diante da “gran preocupación que provoca o aumento das condutas aditivas e as idades de inicio”.