A Xunta debe deixar de estigmatizar á mocidade e encetar campañas de sensibilización para fomentar unha actitude responsable fronte á covid

A portavoz de Mocidade do Grupo Socialista, Paloma Castro, reclamou hoxe “campañas de sensibilización” para acadar unha actitude responsable fronte á covid “no lugar de sinalar e culpabilizar á mocidade”. A responsable socialista anunciou unha serie de iniciativas parlamentarias nas que lle replica ao presidente da Xunta reclamándolle que “deixe de estigmatizar á mocidade e asuma os erros na xestión da pandemia”.

Castro apunta que “entendemos e compartimos a chamada á responsabilidade da poboación como unha das medidas fundamentais para frear os contaxios, pero condenamos a estigmatización”, que ademais “non se sustenta nos datos que achegan as universidades públicas galegas”. Nestes momentos a Universidade da Coruña ten 8 positivos e hai detectado un brote na de Vigo, mentres Santiago conta con 20 positivos e Lugo outros 3 acumulados nunha semana.

A responsable socialista sinala que “as propias universidades denuncian que se culpe ao seu alumnado o empeoramento das cifras xerais nas cidades a causa de facer unha lectura equivocada dos datos de incidencia real”. Apunta que “por áreas sanitarias, a de Ourense, Verín e O Barco continúa sendo a que detecta máis novos positivos diarios por covid-19”.

Sinala que “Feijóo leva dende o inicio da pandemia delegando responsabilidades, xa que no mes de marzo foi o Goberno central, e durante o verán os concellos, para agora pasar a sinalar á mocidade” e pregunta “para cando a sunción de erros e a responsabilidade por unha deficiente xestión”.

Axudas

Neste sentido, no lugar de sinalar á mocidade universitaria, a portavoz de Universidade do Grupo Socialista, Noa Díaz, reclámalle ao goberno galego que convoque unha liña de axudas provisionais para aquel alumnado universitario que ten alugada unha vivenda pero que non vai facer uso dela durante o tempo que determinen as universidades a configuración non presencial dos estudos.

Díaz sinala as “graves dificultades para sufragar os gastos de desprazamento ou vivenda” para as familias con fillos que estean cursando estudos universitarios. Lembra que a Xunta de Galicia “convoca cada ano unha liña de axudas destinadas ao alumnado do Sistema Universitario Galego que teña dificultades económicas por causas imprevistas”. Sen embargo, esta liña de axudas, que se pechou en xullo, “non inclúe a situación excepcional da covid-19”.