O secretario xeral do PSdeG estará presente os dous días da cita impulsada por Pedro Sánchez e Lula da Silva, que reunirá a máis de 3.000 participantes e a oito xefes de Estado e de Goberno para artellar unha resposta progresista común fronte ao avance da ultradereita

O líder dos socialistas galegos aproveitará a súa estancia en Barcelona para manter contactos con dirixentes do socialismo internacional e europeo

“Galicia non é allea ao que está a pasar no mundo. Tamén aquí sentimos a polarización, tamén aquí medran as mentiras e os discursos que exclúen. E fronte a iso, a resposta é máis democracia, máis verdade e máis socialismo”, sinalou

O secretario xeral do PSdeG, José Ramón Gómez Besteiro, asistirá venres e sábado en Barcelona á Global Progressive Mobilisation (GPM), un encontro internacional que reunirá os días 17 e 18 de abril na Fira Gran Via a líderes progresistas de todo o mundo para coordinar respostas comúns aos grandes retos democráticos do momento.

Besteiro participará nas dúas xornadas do foro e aproveitará a súa presenza en Barcelona para manter unha axenda de contactos con representantes do socialismo internacional e europeo desprazados á cidade.

Trátase do maior evento da socialdemocracia internacional do que vai de século, promovido pola Internacional Socialista, o Partido dos Socialistas Europeos e a Alianza Progresista, e impulsado polo presidente do Goberno e líder do PSOE, Pedro Sánchez, xunto co presidente do PES, Stefan Löfven.

Á cita confirmaron a súa asistencia presidentes e primeiros ministros como Lula da Silva (Brasil), Claudia Sheinbaum (México), Gustavo Petro (Colombia), Yamandú Orsi (Uruguai), Cyril Ramaphosa (Sudáfrica), Mia Amor Mottley (Barbados) e Inga Ruginiené (Lituania), ademais do presidente do Consello Europeo, António Costa, a vicepresidenta da Comisión Europea, Teresa Ribera, e o expresidente José Luis Rodríguez Zapatero. Participarán máis de 100 partidos de todo o mundo, sindicatos, activistas e referentes como a Nobel da Paz María Ressa.

Para Besteiro, a presenza do PSdeG nun foro desta magnitude é unha cuestión de coherencia política. O secretario xeral subliña que “o que está en xogo é o futuro das nosas democracias, e Galicia ten que estar aí”. Lembra que os retos que se debaterán en Barcelona, a defensa da democracia, os dereitos humanos, a loita contra os discursos de odio e a resposta á desinformación, “non son problemas afastados, son problemas que tamén vivimos aquí, na nosa terra”.

Besteiro advirte de que os fenómenos que se abordarán en Barcelona non son alleos á realidade galega. “Tamén aquí sentimos a polarización que rompe a convivencia, tamén aquí vemos medrar as mentiras e os relatos enganosos que contaminan o debate público, e tamén aquí se estenden discursos que exclúen e sinalan ao diferente”, apuntou o líder dos socialistas galegos.

Lonxe de tratarse dun problema importado, o secretario xeral do PSdeG lamenta que estas dinámicas xa están instaladas no día a día político e mediático galego, e que requiren unha resposta firme e sostida no tempo. “Fronte ao odio, máis democracia. Fronte á desinformación, máis verdade. E fronte á perda de dereitos, máis socialismo. Esa é a folla de ruta que defendemos os socialistas, en Galicia e no mundo”, sinalou.

Besteiro destaca que a igualdade vertebra boa parte da axenda do foro, con sesións dedicadas ao acceso das mulleres e nenas á xustiza e ao impacto dos recortes de cooperación nas comunidades máis vulnerables. “Non hai democracia plena sen igualdade real. As mulleres teñen que estar no centro de calquera resposta progresista que queira chamarse así”, sinalou.

O encontro pecharase o sábado cunha sesión plenaria a cargo de Sánchez e Lula da Silva, da que sairá unha declaración final articulada en catro eixos: democracia, igualdade, medio ambiente e intelixencia artificial e transformación dixital.