Aitor Bouza levou ao Parlamento a iniciativa que lle reclama ao goberno galego unha solución provisional para as clases de Educación Física mentres executan a obra

A Comisión de Educación do Parlamento aprobou hoxe por unanimidade unha proposición non de Lei presentada polo Grupo Socialista para reclamarlle á Xunta que cumpra co compromiso de construír unha pista cuberta no IES Concepción Arenal de Ferrol. O portavoz de Educación, Aitor Bouza, presentou esta proposta na que lle reclama ao goberno galego que habilite unha solución provisional mentres duren as obras.

O responsable socialista levou ao Parlamento esta demanda da comunidade educativa deste centro e reivindicou “clases de Educación Física en igualdade de condicións ao resto dos centros”, e urxiu a resolver un problema evidente que está a prexudicar ao alumnado deste centro, que chegou a despregar as clases nos corredores do centro pola falla de recursos. Bouza reclamou “calendario e orzamento” para a execución dunha actuación básica que é unha “cuestión de vontade política”.

Lembrou que o propio conselleiro de Educación se comprometeu a realizar esta obra nas eleccións municipais de 2023, pero a día de hoxe aínda no levou “ningún tipo de avance”, e mesmo “nin sequera aparece nos orzamentos da Xunta para 2026”. De feito, Bouza lembrou que el mesmo presentou esta actuación nas emendas aos orzamentos da Xunta para este ano, pero o PP votou en contra, impedindo incorporar a pista cuberta á planificación deste ano.

Ademais, afeoulles a falla de transparencia desta obra, xa que o goberno galego segue negándose a remitirlle ao Grupo Socialista o expediente da obra que reclamou o pasado 27 de novembro, e afeoulle ao portavoz do PP que presumira hoxe de que el si que dispoñía desa información.

Solucións provisionais

Bouza reclamou que mentres non aclaran a execución e calendarización desta obra, a lo menos o goberno galego adopte “solucións provisionais” para permitir que o alumnado poida atender ás clases de Educación Física en condicións.

Reivindicou un “plan alternativo” para que o alumnado poida recibir as súas clases tamén cando faga mal tempo e non poidan saír ao exterior, e que non teña que pasar como co alumnado do IES Ferrol Vello, que teñen que desprazarse en bus ás instalacións deportivas.

Texto da iniciativa aprobada hoxe:

-“O Parlamento galego insta á Xunta de Galicia a:

1. Executar de maneira inmediata a construción da pista deportiva cuberta comprometida no IES Concepción Arenal de Ferrol, garantindo a súa posta en marcha con carácter urxente.

2. Habilitar solucións provisionais inmediatas, garantindo espazos cubertos para impartir Educación Física mentres non se execute a infraestrutura definitiva.

3. Informar formal e puntualmente á comunidade educativa do IES Concepción Arenal sobre o estado real do proxecto, incluíndo fases administrativas, previsión orzamentaria e cronograma de execución”.