Valentín González Formoso reclámalle á Xunta unha saída dialogada ao conflito da mexilla, “creado pola falla de consenso da Consellería do Mar”

O secretario xeral do PSdeG responsabiliza á Consellería de “crear un problema onde non o había por tomar decisións de costas aos sectores implicados sen diálogo nin consenso previo”

Mantivo un encontro en Arousa co sector mexilloeiro e os alcaldes da zona previo ao encontro coas confrarías implicadas a próxima semana

O secretario xeral do PSdeG, Valentín González Formoso, reclamoulle hoxe á Xunta que lle dea unha saída dialogada ao conflito da mexilla, “creado pola falla de consenso da Consellería do Mar”. O responsable socialista mantivo hoxe un encontro en Arousa cos representantes do sector mexilloeiro e os alcaldes da comarca, previo ao encontro, a próxima semana, coas confrarías implicadas.

González Formoso responsabilizou do conflito á Consellería do Mar por “tomar decisións ás costas dos sectores implicados sen diálogo nin consenso previo”, provocando unha confrontación onde “nunca houbera ningún tipo de conflito”. Lembra que ata agora “sempre conviviron perfectamente a necesidade de extracción da mexilla coa extracción do percebe”, ata o momento en que a Consellería decidiu actuar, enfrontando dous sectores “estratéxicos”.

O líder dos socialistas galegos reclamoulle á Consellería do Mar que “sente ás partes” implicadas para “resolver un conflito xerado pola súa torpeza”. Salientou o “ton construtivo” dos representantes dos bateeiros, cunha “actitude moi positiva, propositiva, con disposición a sentarse a dialogar e resolver o problema”, e saudou a “flexibilidade” que amosan e a súa proposta de convocar unha mesa a tres bandas.

Advertiu que o sector está “absolutamente preocupado” polo feito de que “chega a tempada de reposición da mexilla e non van ter posibilidade de acceder a ela, cando necesitan de semente para despois recoller o froito”.

González Formoso mantivo este encontro ao que asistiron a Organización de Produtores de Mexillón de Galicia –Opmega-, a Federación de Mexilloeiros de Arousa Norte, Amegrove e APM Illa de Arousa.

Tamén participaron os portavoces de Pesca e Marisqueo do Grupo Socialista no Parlamento, Patricia Otero e Julio Torrado, e os alcaldes de Vilagarcía –Alberto Varela-, A Illa –Carlos Iglesias-, Cambados –Samuel Lago-, O Grove –Jose Cacabelos-, e o coordinador comarcal do PSdeG no Barbanza, Miguel Paz.