Supresión das axudas da Xunta para vixilantes e asistencia técnica nas confrarías

A portavoz de Pesca do Grupo Socialista, Loli Toja, alertou hoxe das consecuencias da supresión da liña de axudas do goberno galego a vixilancia e asistencia técnica en seis confrarías. No debate dunha iniciativa parlamentaria na Comisión de Pesca, Toja alertou da situación que afecta polo momento aos pósitos de Carril, Vilaxoán, Rianxo, Aldán, Ferrol e Barallobre.

Tan só a Confraría de Rianxo, explicou, perderá este ano 80.000 euros cos que costeaba seis vixilantes e unha bióloga, sen que o goberno galego teña máis resposta que asumir o custe “na medida do posible”. A responsable socialista advertiu que “xa sabemos o que significa a coletilla da medida do posible”, polo que reclamou “garantías” do goberno galego para apoiar ás confrarías “en lugar de estrangulalas”.

Loli Toja preguntoulle ao goberno galego se “realmente son capaces de valorar o impacto desta decisión para o control do furtivismo e a perda de recursos económicos” para as confrarías. Así o dixo no debate dunha pregunta oral na que lle reclamou ao goberno galego un estudo sobre as causas da caída nas extraccións de percebe.

Reclamoulle ao goberno galego que ofreza unha base científica para explicar os motivos desta caída nos tamaños e nas extraccións, cando as extraccións en Cedeira e Corme quedan por debaixo do cupo, en Cariño atopan pezas moi pequenas e en Meirrás ou Valdoviño teñen problemas semellantes. Amosou a súa sorpresa pola resposta da Xunta negando as incidencias que detectan as confrarías, polo que reclamou “informes que aclaren esta discrepancia”.

Habilitar a extracción

A parlamentaria socialista trasladoulle ao goberno galego a demanda das confrarías da Costa da Morte, sinaladamente a de Corme, para que habilite o día de mañá sábado para extraer percebe logo dunha campaña “desastrosa” debido aos temporais e mareas mortas que padeceron no que vai de inverno.