Paloma Castro chama á Xunta a cofinanciar a rehabilitación do Convento de Santa Clara en Pontevedra

Pide ao goberno galego que asuma, como mínimo, a metade do investimento para a recuperación deste inmoble, xa que “o compromiso da Xunta co patrimonio cultural ten que ser irrenunciable”

A parlamentaria pontevedresa Paloma Castro chamou á Xunta a cofinanciar a rehabilitación do Convento de Santa Clara en Pontevedra. Fíxoo, hoxe, a través da presentación dunha pregunta oral ao goberno galego no Pleno do Parlamento.

A dirixente socialista, que puxo en valor este inmoble do século XIII polo seu “valor patrimonial e cultural”, pediu ao goberno galego que asine un protocolo de colaboración co Concello de Pontevedra e a Deputación para complementar ao xa asinado polas dúas institucións para asumir, como mínimo, o 50% do investimento que permita recuperar este ben.

Na primeira visita oficial ao convento, o vicepresidente da Xunta, lamentou a socialista, “evitou confirmar o apoio financeiro da administración autonómica para a rehabilitación deste ben”.

Fronte a isto, Castro incidiu en que “entendemos que a Xunta ten que investir nesta rehabilitación”, como xa fixo noutros lugares de características similares como o Mosteiro de Santa María de Oia, o Convento de San Antonio de Herbón, a Casa Museo de Valle Inclán en Vilanova de Arousa ou as Torres Oeste de Catoira.

“Non é discutible que este inmoble agocha bens que deban ser considerados como de interese para a permanencia, recoñecemento e identidade da cultura galega a través do tempo”, sentenciou a socialista tras sinalar que “o compromiso da Xunta co patrimonio cultural ten que ser irrenunciable”.

Neste sentido, Castro reivindicou o valor do convento para as pontevedresas e pontevedreses que viviron “750 anos de misterio” nos que “ninguén sabía que se ocultaba tras eses muros” e agora, dende o 1 de decembro, “é un ben público” cun “valor especial”.

Por último, a socialista lembrou que o Museo de Pontevedra “ten moitas pezas de arte gardadas e sen poder expoñer ao público por falla de espazo”, polo que a rehabilitación deste espazo “permitiría ampliar o museo e que todas as galegas e galegos poidamos desfrutar destes bens que nos pertencen”.