Pablo Arangüena pídelle á Xunta que paralice a parte das obras de peonalización da OU-536 deseñadas en beneficio exclusivo da familia Baltar

Alerta de que esas actuacións transcorren xusto enfronte das propiedades do presidente da Deputación de Ourense e pide que se dedique o orzamento previsto a outras finalidades de interese público e xeral que contribúan ao desenvolvemento da provincia

O deputado socialista Pablo Arangüena vén de rexistrar unha batería de iniciativas no Parlamento para pedirlle á Xunta que paralice as obras de peonalización da estrada OU-536, no treito que transcorre xusto enfronte das vivendas e propiedades do presidente da Deputación de Ourense e da súa familia, no concello de Esgos.

Arangüena explica que ese tramo de senda peonil ten un quilómetro de lonxitude, que custará 366.666 euros e que “comezará xustamente na vivenda do presidente da Deputación e comunicaraa coas do resto dos seus familiares ou a nave onde Baltar pai almacena a súa colección de coches clásicos”.

Tras lembrar que esas propiedades se atopan nunha zona especialmente despoboada, “a diferenza doutras polas que discorren esa estrada e de moitísimas outras de titularidade autonómica”, Arangüena alerta de que “a obra ten unha relación custo-beneficio moi negativa agás para o presidente da Deputación”. Polo tanto, todo apunta a que “o único criterio que se seguiu para decidir esta actuación foi o de beneficiar en exclusiva á familia Baltar”.

Neste contexto, o parlamentario do PSdeG tamén demanda que, ademais de paralizar estas actuacións, a Xunta destine o orzamento previsto a esta parte da obra “a outras finalidades de interese público e xeral que contribúan, ademais, ao desenvolvemento de Ourense”.

Ademais, Pablo Arangüena pregúntalle ao goberno galego cal é o motivo de que dos 71 quilómetros de estrada que hai entre Ourense e Pobra de Trives, unicamente se fagan obras en 3 quilómetros e 1 estea, precisamente, radicado fronte ás vivendas da familia do presidente da Deputación. Tamén quere saber se existe algún estudo ou informe “que xustifique a conveniencia de construír sendas peonís xustamente nese lugar”. Asemade pregunta cantos dos 5.500 quilómetros de estradas de titularidade autonómica ten previsto peonalizar a Xunta, como fai co tramo que transcorre fronte ás vivendas da familia Baltar.

Na súas iniciativas, o deputado socialista explica que a conselleira de Infraestruturas presentou recentemente o proxecto polo que a Xunta de Galicia ten previsto investir 1,1 millóns de euros procedentes do FEDER na construción de sendas peonís na estrada de titularidade autonómica OU-536, que une Ourense con Pobra de Trives. “Un terzo dese importe”, subliña, “corresponde ao tramo situado fronte ás vivendas e propiedades do presidente da Deputación de Ourense, do seu pai, da súa cuñada e da familia da súa muller”.

A maiores, afonda en que entre Ourense e Pobra de Trives discorren 71 quilómetros, dos que unicamente van ser peonalizados tres quilómetros en dous tramos. Un deles será de dous quilómetros, en Pereiro de Aguiar; e outro será de un quilómetro no concello de Esgos. É este último o que coincide fronte a esas vivendas da familia Baltar e a nave onde o ex-presidente da Deputación almacena a súa colección de coches clásicos.