Os senadores Fernández Leiceaga e Antonio Vázquez manteñen un encontro coa alcaldesa de Bergondo para analizar as necesidades de infraestruturas do Concello

O coordinador da Interparlamentaria do PSdeG e senador Xoaquín Fernández Leiceaga, e o tamén senador por A Coruña Antonio Vázquez, mantiveron hoxe unha xuntanza coa alcaldesa de Bergondo, Alejandra Pérez, para analizar as necesidades de infraestruturas do Concello que afectan ao goberno de España.

Analizaron neste encontro a execución dunha nova rotonda prevista para a N-VI ao paso por Betanzos, unha actuación co proxecto xa realizado e que “necesitaría dun impulso para a súa execución”, sinala Fernández Leiceaga. Tamén analizaron a necesidade de reforma da liña de ferrocarril entre Ferrol e A Coruña ao paso pola localidade coruñesa.

Os dous senadores e a alcaldesa traballaron tamén sobre a posibilidade que abren os fondos Next Generation EU para o concellos, sinaladamente para o impulso á dixitalización, as axudas á rehabilitación de edificios e a transición enerxética.

Fernández Leiceaga e Antonio Vázquez mantiveron este encontro dentro dunha ronda de visitas que comezou onte coa visita á localidade veciña de Betanzos, onde se reuniron coa alcaldesa, a tamén socialista María Barral.