Orzamentos 2020: Criterios obxectivos na Deputación de A Coruña Vs “caciquismo” no reparto de fondos da Xunta con criterios políticos

A parlamentaria socialista Begoña Rodríguez Rumbo comparou hoxe a xestión “con criterios obxectivos” da Deputación de A Coruña coa “falla de transparencia” e reparto subxectivo de axudas por parte do goberno galego. Así o dixo na comparecencia do presidente da Deputación de A Coruña, que presentou as contas da entidade que preside diante do Parlamento.

A responsable socialista situou ao organismo provincial como “exemplo de xestión adaptada á actualidade, na que os alcaldes non teñen que acudir como pedigüeños para facer as súas reivindicacións, como nos teñen afeito na Xunta de Galicia”. Explicou que os 93 concellos da provincia son tratados “con equidade e transparencia” atendendo ás súas necesidades “en base a criterios obxectivos”.

Do outro lado, dixo, a Xunta “entende que os alcaldes teñen que acudir ao despacho dun xestor público para solicitar recursos, que lles son concedidos segundo a necesidade e urxencia que considera a Xunta de Galicia”. Por iso, dixo, “resulta que a Xunta repartiu un mínimo de 63 millóns de euros que en 9 de cada 10 casos foron entregados a concellos do PP”, mentres “lexislan para que os concellos asuman competencias pero sen darlles orzamentos para desenvolvelas”.

A Deputación de A Coruña, dixo, “atende ás necesidades dos concellos do século XXI cunha administración do século XXI, prestando servizos man con man cos concellos” e atendendo ás súas “xustas reivindicacións”. En contra do criterio do goberno galego, engadiu, a colaboración da Deputación fundaméntase “en base a criterios obxectivos previamente coñecidos e publicados, nos que a cor política non é o criterio para o reparto de axudas”.

Chegan ao punto, dixo, de afrontar competencias propias da Xunta para destinar 10 millóns de euros a axudas á empregabilidade en 93 concellos, mentres o goberno galego deixa sen executar 266,4 millóns para impulso do emprego en toda Galicia. Sinala que malia o desleixo da Xunta, o emprego é un dos problemas máis importantes do país, ata o punto que de acordo coa EPA do terceiro trimestre, Galicia perdeu 50.500 ocupados dende 2009 e ten 143.500 parados.