O deputado socialista Juan Carlos Francisco leva ao Parlamento a desatención por parte da Xunta da Galicia rural e do interior, unha situación que xera “unha Galicia a dúas velocidades” na que se acentúan os problemas de despoboamento
Santiago, 30 de maio de 2021. O PSdeG levará ao Parlamento a desatención por parte da Xunta da Galicia rural e do interior, unha situación que xera “unha Galicia a dúas velocidades” na que se acentúan os problemas de despoboamento.
Así o sinalou o deputado socialista Juan Carlos Francisco Rivera, quen vén de reclamar ao goberno galego -a través dunha iniciativa parlamentaria- que elabore un mapa de servizos básicos que garanta o acceso para o conxunto da poboación na totalidade do territorio de Galicia.
“Non podemos consentir que deixen esmorecer o rural”, subliñou o parlamentario ourensán, consciente da importancia das políticas de vertebración territorial e de que “non pode haber galegos de primeira e galegos de segunda”.
De feito, Juan Carlos Francisco subliñou que hai “modelos de éxito” que Galicia pode seguir para revitalizar o rural e frear o devalo demográfico, como o caso de Escocia, e por iso urxiu a Feijóo a que “abandone a propaganda como única estratexia” e impulse “un cambio de modelo”.
INICIATIVA PARLAMENTARIA
No texto rexistrado na Cámara, o deputado verinense reclama á Xunta a elaboración dun catálogo de servizos para todas as bisbarras, así como que calquera decisión de peche nas zonas en risco de despoboamento requira un informe dun organismo especializado.
Deste xeito, como sinalou o socialista, decisións como o peche do paridoiro de Verín non poderían ser tomadas só polo goberno de turno.
Ademais, na súa iniciativa, Juan Carlos Francisco demanda a creación dun Fondo de Cohesión Demográfica que se destine aos concellos “en grave crise demográfica” para que tomen medidas.
En paralelo, defende a necesidade de impulsar un modelo de transporte público que garanta a accesibilidade aos centros prestadores de servizos básicos e que teña rutas e horarios compatibles cos horarios laborais e de formación; así como un plan de mellora da conectividade de banda larga en todo o territorio.
Trátase, como dixo o socialista ourensán, dun conxunto de medidas fundamentais en boa parte das provincias de Ourense e Lugo, así como en bisbarras como A Paradanta en Pontevedra ou o interior coruñés, que sofren problemas demográficos e un déficit de servizos.
A portavoz de Política Forestal do Grupo Socialista, Carmen Rodríguez Dacosta, alertou de que a Xunta aínda non comezou cos…
Dirixentes e cargos públicos do PSdeG manifestaron hoxe a súa “sincera e fonda preocupación” polo que consideran unha “grave declaración…
Lamenta o voto en contra do PP á proposta socialista para implantar un programa de educación ambiental nos centros educativos…
A nova Executiva do PSdeG reuniuse hoxe por primeira vez tras o Congreso extraordinario do pasado domingo, coincidindo co 145.º…
Advirte que “tan insensato é pretender o desenvolvemento indiscriminado de toda a potencia eólica solicitada como optar pola prohibición total…
Paloma Castro critica o voto en contra do PP no Parlamento á ampliación dos polígonos de Reigosa, Fragamoreira e O…