“Se temos datos en tempo real, iso hai que aplicalo ás políticas, que é o que non se está facendo”, censurou a deputada socialista Paloma Castro

A portavoz socialista de Marisqueo, Paloma Castro, criticou hoxe en comisión parlamentaria que a Xunta presuma “de observatorios, de monitorización e de tecnoloxía avanzada” nun momento no que “a realidade do sector marisqueiro son bancos pechados, caída da produción e perda continuada de ingresos no sector”.

A deputada do PSdeG reclamoulle ao Goberno galego que realice “o verdadeiro exame”, que consiste en coñecer as causas de que as rías galegas perdan produtividade “e por que o marisqueo galego atravesa unha crise sen precedentes que provoca que miles de familias vivan con cada vez máis incerteza”.

Castro lamentou que, pola contra, o Goberno autonómico “leva anos sen ofrecer unha resposta integral e efectiva” á situación do sector. “Claro que fai falta protección social para as mariscadoras e mariscadores que ven como desaparecen os seus ingresos, pero tamén fai falta algo fundamental: investigación rigorosa, coordinación científica e vontade política para chegar ao fondo das causas desta crise ambiental e produtiva”, argumentou.

“Unha tomadura de pelo ao sector”

Por outra banda, censurou que o PP viva “de costas á realidade” defendendo a xestión da Xunta e falando de “senda de crecemento”. “É unha tomadura de pelo ao sector”, salientou.

“Se temos datos en tempo real, iso hai que aplicalo nas políticas, que é o que non se está facendo”, afirmou, e insistiu en que “observar non chega, medir non chega, recoller datos non chega”. “O que Galicia necesita é que todo ese coñecemento sirva para tomar decisións”, concluíu.