A portavoz de Política Social do Grupo Socialista, Noela Blanco, lamentou hoxe o veto do PP a unha proposta socialista na que reclamaba unha inspección do funcionamento do Punto de Encontro Familiar –PEF- de Ourense e a súa posterior relocalización. O PEF está situado actualmente na Casa da Xuventude, un emprazamento “absolutamente inadecuado” que dificulta a privacidade dos usuarios e usuarias deste servizo.

Blanco alertou da situación do PEF, xestionado pola empresa Eulen, que contribúe a “lesionar a dignidade das mulleres e dos nenos e nenas” usuarios, que son revitimizados, tratando os casos “coma se se tratara de divorcios conflitivos”. Ademais, néganse a coordinarse con profesionais dos servizos sociais, sanitarios e educativos, e a saturación chega ao punto de impedir que unha muller vira á súa filla de 3 anos durante dous meses.

A parlamentaria socialista denunciou que a decisión de situar o PEF na Casa da Xuventude, que se remonta ao ano 2013, responde a unha “operación sen escrúpulos de Feijóo de baleirar de contido un inmoble histórico e convertela nun edificio administrativo máis”, utilizando ás mulleres vítimas de violencia machista como “vítimas colaterais” provocándolles “danos terribles”.

A Casa da Xuventude é, lembrou, a segunda máis antiga de toda España, “un reduto baseado na liberdade, na participación da mocidade e na democracia, un gran espazo dinamizador da cultura da época de Benito Losada, que Feijóo se encargou de dinamitar dende que chegou poñendo á súa curmá a dirixila”.

Os socialista reclamaron hoxe unha inspección do funcionamento, aplicación dos protocolos e dos medios materiais do PEF de Ourense, co seu correspondente informe público. Tamén esixiu a relocalización do servizo “nun emprazamento máis axeitado, que garanta que se protexa axeitadamente a confidencialidade necesaria para este tipo de servizo escoitando ás mulleres e aos nenos e nenas vítimas de violencia de xénero e ás profesionais que traballan con elas”.

Violencia de xénero

Noela Blanco denunciou a “hipocresía” do PP ao “gabarse de ter políticas contra a violencia mentres son os que paralizan o pacto de Estado contra a Violencia de Xénero” que “tivo que activar Pedro Sánchez” e que van “colléndose do ganchete da estrema dereita negacionista e machista que –engadiu-, non quere participar do minuto de silencio en memoria polas últimas vítimas de violencia de xénero”.