A parlamentaria socialista Noela Blanco esixiulle hoxe ao goberno galego que responda con “orzamentos para dar pico e pala” e rematar coas obras de mellora da estrada entre A Gudiña e A Rúa, incluíndo a ampliación ao terceiro carril en diferentes tramos. Blanco presentou unha iniciativa en Comisión reclamando as obras, que foi rexeitada polo PP para impoñer a súa propia iniciativa reducindo as obras a “un estudo de mellora”.

A responsable socialista reclamoulle hoxe á Xunta que execute antes do remate da Lexislatura en 2020 as obras pendentes no vial OU-533 que une A Rúa, Petín, Larouco, O Bolo, A Veiga, Viana do Bolo, Vilariño de Conso e A Gudiña, incluíndo a construción do dito terceiro carril. Acusou ao PP de darlle “cambiazo” a unha demanda necesaria dende hai 10 anos para incluír unha iniciativa na mesma comisión pedindo “un estudo”.

Lembrou que nos últimos 5 anos o PP “deixou sen executar en Galicia 2.000 millóns de euros, e Ourense foi unha das prexudicadas, rexeitando sistematicamente as emendas dos socialistas aos orzamentos para executar esta obra, ou metendo “nun caixón” durante dous anos o proxecto de circunvalación de O Barco durante os gobernos de Rajoy.

Contrastou a parálise do PP coas actuacións do Executivo de Pedro Sánchez, que en decembro aprobou o proxecto de circunvalación de O Barco e “en menos dun mes xa se licitou no BOE con 60 millóns de euros para unha infraestrutura que enlazará as estradas N-536 e N-120. Ademais, sinalou, hai xa 3 tramos da autoestrada A-76 entre Ourense e Ponferrada en fase de redacción, e o que pasa por Monforte de Lemos xa están en marcha.

Instou ao goberno galego a responder ás peticións da comarca, que “leva anos reclamando a mellora da mobilidade, reducir os temos de percorrido, incrementando a seguridade viaria e unha vía necesaria para vertebrar a mobilidade das persoas que utilizarán a alta velocidade para desprazarse dentro de Galicia”.