O Parlamento aproba a proposta socialista para que a Xunta presente canto antes a Fundación Pública para o impulso da Ciencia de Galicia

Julio Abalde reclámalle ao presidente da Xunta que cumpra co compromiso anunciado o pasado mes de outubro e advirte que o I+D+i “non pode seguir con meros anuncios sen continuidade”

O Pleno do Parlamento aprobou hoxe a proposición non de Lei presentada polo Grupo Socialista para reclamarlle á Xunta que presente “á maior brevidade” a proposta de creación da Fundación Pública para o Impulso da Ciencia de Galicia. O portavoz de Universidade do Grupo Socialista, Julio Abalde, reclamoulle hoxe ao presidente da Xunta que faga realidade este compromiso anunciado no mes de outubro.

O responsable socialista advertiu que o “ecosistema” do I+D+i galego “non pode seguir con continuos anuncios e programas” do goberno galego que “non teñen continuidade na articulación, coordinación e financiamento entre as distintas propostas nin entre os xestores dos programas”. Reclamoulle por iso ao goberno galego que faga realidade o compromiso e entregue toda a documentación sobre a estrutura, competencias, función e financiamento deste organismo.

Subliñou que os socialistas galegos propoñen un Pacto Galego pola Ciencia e a Investigación da man do tecido investigador galego, as universidades, os centros de investigación e tecnolóxicos, academias científicas ou clústeres de empresas tecnolóxicas. O obxectivo é definir un plan de I+D+i que garanta o desenvolvemento dunha carreira investigadora estable con condicións laborais dignas e financiamento estable garantido a longo prazo.

Para iso precisa de estruturas e programas de xestión estables, que garantan o traballo de persoal investigador dende a formación predoutoral, cunha ferramenta de captación, atracción e retención do talento.

Advertiu que malia que intente imitar ás iniciativas catalana -Icrea- e vasca -Ikerbasque-, baseados nunha rede de centros con natureza xurídica propia -pública en Cataluña e unha rede pública e privada que coexiste coas universidades no caso de Euskadi-. Este modelo sen embargo “non serve para Galicia”, xa que nesta Comunidade Autónoma “non existen centros de investigación privados, e os públicos son maioritariamente centros universitarios de natureza xurídica independente.

Ademais, sinalou que mentres Galicia ten un gasto en I+D de 1,1 por cento do PIB, cando a media nacional é de 1,48 e no Pais Vasco é superior ao 2 por cento, o que fai inviable este modelo. Afeoulle ao goberno galego que diga Galicia é das comunidades nas que máis incrementou o gasto en I+D, pero a realidade é que o gasto per cápita en I+D en Galicia é de 360 euros ao ano, mentres que en Cataluña é de 695 euros ao ano e no Pais Vasco ascende a 954.

Julio Abalde explicou neste sentido que as actividades de captación e retención de talento necesariamente teñen que apoiarse directamente nas universidades, que deben ter liñas de financiamento específicas para a dotación destas figuras ou o financiamento estrutural da investigación.

Texto da iniciativa aprobada hoxe:

-“O Parlamento insta á Xunta de Galicia a remitir e explicar na Cámara, á maior brevidade, a proposta de creación da Fundación Pública para o Impulso da Ciencia de Galicia, incluíndo toda a información sobre a súa estrutura, competencias, funcións e financiamento”.