Noelia Otero pide á Xunta a ampliación do Centro de Saúde de Bouzas ao abrir “minguado e sen capacidade de ofrecer un servizo de calidade”

Lamenta que, despois de agardar máis dunha década para a súa posta en funcionamento, o goberno da Xunta recortase a superficie proxectada e eliminase tanto o servizo de pediatría como o servizo social

A deputada viguesa Noelia Otero pediu á Xunta, hoxe, no Parlamento de Galicia, a través da presentación dunha batería de iniciativas, a ampliación do Centro de Saúde de Bouzas despois de que abrise hai un mes “minguado e sen capacidade de ofrecer un servizo de calidade” en relación ao número de veciños e veciñas que viven no barrio.

“Despois de agardar máis dunha década para a súa posta en funcionamento e dunha parálise que derivou en atrasos reiterados, o goberno de Feijóo decidiu recortar a superficie proxectada, eliminar o servizo de pediatría e o de traballo social nun centro do que dependen arredor de 6.000 veciños e veciñas”, alertou a dirixente socialista.

Neste sentido, Otero lamentou que as instalacións dispoñan de “menos espazo, menos consultas e menos persoal”, o que repercute directamente no servizo prestado. Ademais, incidiu, “a decisión de derivar ás e aos menores de Bouzas ao Centro de Saúde de Navia supón saturar un centro de saúde xa de por si sobrecargado ante a elevada demanda infantil” desta zona.

Por todo isto, a voceira socialista pediu á Xunta que recupere as seis consultas previstas no proxecto inicial, incluíndo ao persoal sanitario necesario, así como a creación da consulta de pediatría e o servizo de traballo social que permitan desenvolver un servizo “de calidade” e cun horario de mañá e tarde.

“Tras 12 anos dunha política sanitaria errática marcada polos recortes do PP, cómpre reforzar a sanidade pública galega e, especialmente, a Atención Primaria que se atopa desbordada e con listas de espera que chegan ata os 15 días mesmo para citas telefónicas”, sinalou Otero despois de lembrar que este verán nun PAC de Vigo “unha facultativa chegou a atender a 98 pacientes nun só día, o que supón tres veces máis do que establecen os canons de funcionamento da Primaria”.