Noelia Otero alerta das consecuencias sociosanitarias da pandemia provocadas pola a falla de resposta da Xunta, como constata o informe da Valedora

A portavoz do Grupo Socialista na Comisión de Peticións á Valedora do Pobo, Noelia Otero, alertou hoxe de que as queixas rexistradas pola Alta Comisionada “dan a medida das consecuencias sociosanitarias da pandemia provocadas pola falla de resposta da Xunta”. Así o dixo na comparecencia de Fernández Galiño para presentar o informe anual do pasado ano 2020, “marcado pola covid e as súas consecuencias nas persoas máis vulnerables”.

Otero apunta que a Consellería de Sanidade foi a destinataria dun maior número de queixas, sinaladamente polas listas de espera e as dificultades de atopar cita e recibir atención nos centros de saúde, así como o colapso das liñas telefónicas ou os problemas da atención presencial. Ademais, sinalou o “desamparo daquelas persoas que rexeitan ser derivadas a centros privados e pasan a ocupar “o limbo das listas non estruturais, á marxe dos tempos de espera legais”.

A responsable socialista apunta que o informe da “a fotografía da gran vulnerabilidade que padecen os nosos maiores, que a pesares de vivir nun país cuns datos de avellentamento importantes, carece dunha Lei que os ampare, e nin tendo as competencias corrixen as políticas e as prácticas que nos sacaron as vergoñas”.

Noelia Otero apuntou que “estamos a ver a factura das políticas de desmantelamento das residencias públicas, da súa privatización, así como a dos coidados dos maiores e dos máis vulnerables”. Apuntou que esta situación explica que “non hai sociedade que resista –e do vivido compre aprender e tomar nota- sen a solidez dun sistema baseado na xustiza social”.

Lamentou que o desinterese do goberno galego na aplicación da Lei da Dependencia convirte ano tras ano de informes da Valedora nunha sorte de “día da marmota”, onde “volvemos atopar de novo queixas polas valoracións da Dependencia”, sinaladamente polo incremento dos tempos de espera.

O informe correspondente ao ano 2020 tamén pon o acento sobre as eivas na atención ao alumnado con necesidades educativas especiais, así como pola falla de protección do patrimonio, a discriminación por cuestión de xénero no acceso á profesión xudicial ou nos atrasos provocados na xustiza pola situación de colapso do Instituto de Medicina Legal de Galicia.