Noa Díaz urxe á Xunta a presentar o Plan de Arquivos de Galicia, que tiña que ter aprobado hai sete anos

A portavoz de Cultura do Grupo Socialista, Noa Díaz, reclámalle á Xunta que presente antes de que remate o ano un Plan de Arquivos de Galicia, dando cumprimento á Lei de arquivos e documentos de Galicia, que en 2014 daba un ano para que fora aprobado. Este retraso, sinala, “proba a desidia” do goberno galego diante do estado de “total precariedade” dos arquivos de Galicia.

Díaz presenta esta iniciativa con motivo da conmemoración, hoxe, do Día Internacional dos Arquivos, e lembra que “os arquivos son instrumentos que garanten a pervivencia da nosa memoria colectiva, social e institucional, á vez que aseguran unha mellor e maior gobernabilidade”. Actualmente o estado dos arquivos públicos de Galicia é crítica, “consecuencia da ausencia dunha política arquivística a medio e longo prazo”.

O desleixo do goberno galego, engade, “ten como resultado a perda inxente de documentación, co que periga non só o noso patrimonio, senón tamén a posta en marcha da administración electrónica de maneira eficaz”. Reclama por iso comezar polo Plan de arquivos, que tiña que ter sido aprobado hai 7 anos para “avaliar as necesidades de persoal e de infraestruturas dos arquivos do Sistema de Arquivos da Xunta de Galicia.

Reclama un “verdadeiro proxecto estruturado para a configuración, organización, integración, servizo e difusión dos arquivos de Galicia”, así como “accións inmediatas para os arquivos que precisen accións urxentes”. Ademais, reclama incluír a perspectiva de xénero “dende tódalas ópticas posibles”, que pasa por incorporar marcadores ad hoc nas ferramentas de busca e difusión do patrimonio documental, así como utilización de linguaxe non sexista.

O Grupo Socialista reclama a convocatoria urxente de prazas de arquivistas, que rematen coa precariedade laboral que padece este corpo, así como incorporar aos orzamentos do goberno galego “dunha partida suficiente para solucionar o problema dos espazos físicos”. Ademais, esixe “unha política de selección documental sólida que evite a destrución case indiscriminada de documentos en procesos apresurados que privan a memoria de fontes primarias”.

Noa Díaz inclúe ademais a creación e dotación de arquivos centrais nas consellerías, así como unha liña de axudas específica, acordada coa Fegamp, para a contratación de persoal cualificado para traballar nos arquivos municipais.