Noa Díaz reclámalle á xunta que reforce os recursos contra a violencia machista

A portavoz de Igualdade do Grupo Socialista, Noa Díaz, vén de reclamarlle á Xunta un reforzo nos recursos autonómicos destinados á loita contra a violencia machista. Díaz reclamou incrementar o financiamento aportado polo goberno galego “a maiores do percibido polo Pacto de Estado contra a Violencia de Xénero” e a modificar a actuación institucional para mellorar o traballo orientado á prevención destes casos.

A parlamentaria socialista reclamoulle ao goberno galego que promova a cobertura do cen por cen do territorio galego con recursos dirixidos a mulleres vítimas de violencia machista, incluíndo garantir un acceso viable aos Centros de Información á Muller –CIM- para toda a poboación. Apostou por evolucionar estes CIM para “garantir que sexan centros de asesoramento reais para as mulleres”.

Do contrario, alertou, “haberá que pensar en recursos novos para que as mulleres de núcleos pequenos ou do rural poidan eludir expoñerse nestes centros”, logo das experiencias en zonas rurais, onde a escasa intimidade vólvese na contra destes servizos.

Falla de información

Criticou o escurantismo do goberno galego á hora de xestionar as partidas que recibe Galicia derivados do Pacto de Estado contra a Violencia de Xénero. Reivindicou a posta en marcha de mecanismos de control que permitan coñecer o nivel de execución do Pacto de Estado en Galicia e que a Xunta faga público “en que invisten os recursos” para que “poidamos coñecer da efectividade destas partidas”.

Ademais do incremento de orzamentos, chamou a atención sobre a necesidade de traballar na prevención a tódolos niveis, que a día de hoxe demóstrase como a “maior eiva” na loita contra a violencia machista. Sinalou a importancia fundamental dunha formación acaída dos profesionais públicos e o aumento dos recursos destinados a políticas preventivas que permitan cortar de raíz estes casos, “antes de que se produzan e de que teñamos que lamentar danos irreparables”.