O portavoz socialista advirte que a estratexia agora “non pode ser salvar a Semana Santa” e recorda que aínda non se aprobou a anunciada ampliación das axudas “para os milleiros de negocios aos que a Xunta lles puxo o candado o pasado 26 de xaneiro”
O secretario xeral do PSdeG, Gonzalo Caballero, interveu hoxe no pleno do Parlamento para propoñer a Feijóo que, tralo “fracaso de Salvar o Nadal” non busque agora “salvar a Semana Santa”, senón que traballe para “salvar á xente: protexer a súa saúde e rescatar a súa economía”.
Neses eidos, garantiu Gonzalo Caballero, o goberno galego “terá a lealdade do Partido Socialista”, que “nunca” cuestionou as restricións adoptadas para tentar frear o avance da pandemia. Iso si, deixou claro que “non seremos cómplices das vacinacións irregulares” que se están producindo en Galicia. En concreto, referiu os 200 casos que recoñeceu o xerente do hospital de Pontevedra e as vacinas que se puxeron á alcaldesa do PP en Boimorto e á conselleira delegada de DomusVI.
“Necesitamos unha xestión transparente e eficiente das vacinas”, reclamou o líder do PSdeG, quen fixo fincapé en que “non pode ser” que a primeira directiva “dun imperio xeriátrico no que faleceron máis de 2.600 persoas en toda España” estea inmunizada fronte á covid cando “tanto persoal sanitario e de servizos sociais” aínda non está vacinado.
“Cómpre aclarar o ocorrido, porque é unha labazada na conciencia colectiva de Galicia”, evidenciou, ao tempo que criticou que Feijóo se negase a investigar a vacinación irregular dunha empresaria “próxima ao Partido Popular”.
Así o dixo Gonzalo Caballero no contexto dunha terceira onda da covid que “está golpeando con moita dureza a Galicia”, como amosa o feito de que dende o Nadal faleceron en Galicia unhas 600 persoas e de que a taxa de falecementos por 100.000 habitantes en Galicia no que vai de ano é superior á que presentan comunidades como Cataluña ou Madrid: “temos un número moi alto de contaxios e, cunha poboación tan envellecida como a nosa, as consecuencias están sendo estremecedoras”.
Ademais, o responsable do PSdeG subliñou o “alto nivel de presión hospitalaria” que existe en Galicia para afrontar a pandemia logo de “tantos anos de recortes”. “O persoal sanitario está dobrando turnos, persoal non especialista está atendendo UCIs e xa está habendo que alugar quirófanos en hospitais privados para desviar cirurxías urxentes que non se poden atender na rede pública”, sinalou, para incidir na necesidade de “fortalecer a sanidade pública”.
RESCATAR A ECONOMÍA
Gonzalo Caballero tamén puxo o foco na necesidade de “rescatar a economía”, toda vez que “pasan os días” e a Xunta “segue sen levar ao DOG o segundo paquete de apoio para os milleiros de negocios aos que lle puxo o candado o pasado 26 de xaneiro”.
“Os hosteleiros, os comerciantes, os ximnasios, os traballadores da cultura do noso país… están ao límite”, asegurou o máximo dirixente do PSdeG, consciente de que os nosos sectores “necesitan ter na Xunta un aliado”.
“A Xunta é a única administración galega que recibiu centos de millóns de euros para compensar a caída da actividade económica, pero falla a xestión e as axudas non dan chegado aos sectores afectados”, recalcou.