Begoña Rodríguez Rumbo rexeita un “sistema caciquil, que non respecta a autonomía local e non está baseado nun plan de reequilibrio territorial para Galicia”

Lamenta que “nun orzamento expansivo para 2021 que medra 1.575 millóns de euros” as transferencias “a entidades locais diminúan en case 11,5 millóns de euros”

A voceira de Orzamentos do Grupo Socialista, Begoña Rodríguez Rumbo, vén de criticar o “reparto a dedo” de fondos públicos da Xunta aos concellos galegos gobernados polo PP. Fíxoo, hoxe, no Pleno do Parlamento, durante a presentación dunha interpelación sobre a política da Xunta en relación co financiamento local.

“O goberno galego fala de compromiso cos concellos, cando a realidade é que menospreza aos concellos galegos decidindo, dende a súa posición privilexiada, as competencias, as achegas e cales son os concellos aos que beneficia”, sentenciou Rodríguez Rumbo, que criticou que a Xunta non incrementase o Fondo de Cooperación Local “nin un só euro dende 2009”.

A responsable socialista criticou a “falla de equidade e xustiza” no reparto de fondos dun “sistema caciquil, que non respecta a autonomía local e que non está baseado nun plan de reequilibrio territorial para Galicia”. Ademais, lamentou que o sistema “non procure a cobertura de servizos básicos para toda a cidadanía galega, independentemente de onde viva”.

Nesta liña, lamentou que a Xunta “non cumpra cos principios de transparencia e obxectividade contemplados na lei de transparencia e bo goberno de Galicia ni respecte a lei de subvencións”, cando, por exemplo, “en catro anos, case 5,5 millóns de euros dos algo más de 6 millóns de euros conveniados pola Vicepresidencia primeira e Consellaría de Presidencia, Xustiza e Turismo” foron destinados “para concellos gobernados polo PP”.

“Nun orzamento expansivo para 2021 que medra 1.575 millóns de euros, os concellos son un dos grandes sacrificados. As transferencias a entidades locais diminúen para 2021 en case 11,5 millóns de euros, sendo das poucas partidas orzamentarias que baixan, cando as necesidades locais incrementaron e asumiron máis competencias que non lle correspondían”, aseverou a responsable socialista.

Por último, Rodríguez Rumbo urxiu á Xunta a incrementar a contía dos Fondo de Cooperación Local para que os concellos exerzan as súas competencias “sen tutelas, sen condicións e para mellorar a vida da súa veciñanza”.