O portavoz de Agricultura do Grupo Socialista, Martín Seco, acusou hoxe ao goberno galego de terlle negado axudas directas aos viticultores de Chantada afectados pola tormenta de pedrazo de hai dúas semanas. Seco presentou unha pregunta oral en Comisión na que reivindicou unhas axudas semellantes ás aprobadas para os viticultores de Sober en 2016, coa diferenza de que daquela faltaban 6 días para as eleccións.

O responsable socialista criticou que o goberno galego teña emprendido unha “fuxida cara diante” centrándose en reclamar axudas europeas ou pedirlle ao goberno de España que declare a zona catastrófica. Resumiu que “parécenos ben se queren pedir a situación de zona catastrófica, pero o realmente importante é que actúen con rapidez con axudas directas e cun Plan de Actuación para garantir a actividade do viñedo nos próximos anos.

Contrastou a estratexia adoptada hoxe coa súa actuación en 2016, cando nin citaron a declaración de zona catastrófica “porque non procedía pedirlle nada ao goberno de Rajoy”, mentres aprobaban unha liña de axudas propias horas antes da convocatoria electoral. Daquela habilitaron 500.000 euros, que se repartiron a razón de 7.000 euros por hectárea para facer fronte á perda de 900.000 quilos de uva.

As treboadas de pedrazo provocaron desta volta unhas perdas estimadas de un millón de euros, segundo o sindicato Unións Agrarias, logo de arrasar 70 hectáreas, estragando 700.000 quilos de uva dos viñedos de Pesqueiras, Sabadelle, San Fiz de Asma e Belesar, no Concello de Chantada. Considera así “máis necesario que nunca que a Xunta se sitúe a carón dos viticultores e faga algo máis que acudir á zona cos técnicos a avaliar os destrozos”.

Viticultura social

Seco reclamoulle ao goberno galego un compromiso coa viticultura social das pequenas explotacións, e que faga valer a Lei da Cadea Alimentaria para vincular calquera liña de liquidez ou axuda ás adegas coa recollida de uva a prezos suficientes para cubrir os gastos de produción. Preguntou “para que vale a Lei se logo non articulamos mecanismos para garantir que os produtores non perdan cartos garantindo o pago por enriba dos custes de produción”.

O responsable socialista alertou fronte ás prácticas abusivas dos compradores de uva, que “aproveitan que os gastos reais que asumen os viticultores non están cuantificados para impoñer uns prezos que moitas veces non cobren os custes de produción”.