O secretario xeral do PSdeG chama a “manter toda a presión” sobre a empresa de cara a “manter a actividade industrial e o emprego” na Mariña

Santiago, de novembro de 2020. O secretario xeral do PSdeG, Gonzalo Caballero, celebrou que o Tribunal Superior de Xustiza de Galicia comunicase hoxe o seu rexeitamento cautelar ao propósito de Alcoa de paralizar as cubas da planta de San Cibrao, o cal practicamente suporía o peche da factoría da Mariña.

Neste contexto, Gonzalo Caballero reclamou á multinacional que “deixe a chantaxe” e leve a cabo a venta da planta lucense ao investidor interesado ou á propia SEPI, unha opción xa formulada polo Ministerio de Industria.

“Alcoa ten que poñer fin á súa estratexia de desmantelar a factoría de San Cibrao para reducir a súa competencia na produción de aluminio”, incidiu o líder do PSdeG, quen valorou que a decisión xudicial, unida á fronte común do Goberno de España e a Xunta, ten que servir para “manter toda a presión” sobre a empresa.

E é que, como dixo, a multinacional “ten que asumir a venda dunha factoría que é viable” e para a que o Ministerio de Industria atopou un investidor interesado en “manter a actividade industrial e os postos de traballo”.