Gonzalo Caballero propón á Xunta “compromiso” con Chantada, apostando por melloras no centro de saúde, a depuración de augas e a biblioteca

Chantada, 29 de xaneiro de 2021. O secretario xeral do PSdeG, Gonzalo Caballero, mantivo hoxe unha xuntanza de traballo coa voceira socialista na vila, Raquel López.

Dende alí, Gonzalo Caballero demandou á Xunta que amose “compromiso” con Chantada, apoiando o proxecto da depuradora municipal e mellorando o local da biblioteca, ademais de apostando polo centro de saúde onde a telemedicina non arranxa os problemas da Atención Primaria.

“O goberno galego ten que apostar por darlle futuro á Galicia interior”, sinalou o líder do PSdeG, quen subliñou como “fundamental” dar servizos de boa calidade para fixar poboación no rural.

Así pois, Gonzalo Caballero lamentou que o PP non aceptara ningunha das emendas do Grupo Socialista aos Orzamentos da Xunta para mellorar os servizos sociais para impulsar as necesidades de Chantada.

Nese bloque de propostas, ademais, o PSdeG reclamou “unha aposta decidida” da Xunta pola creación de emprego e a formación dos desempregados na bisbarra, así como para medidas de apoio á hotalería e o comercio local.

Finalmente, no eido sanitario, Gonzalo Caballero requiriu medidas de “reforzo”, con servizos de Neuroloxía, Cardioloxía e Dixestivo no hospital de Monforte, melloras na atención primaria e atendendo unha cuestión longamente demandada como é o reforzo da Psicoloxía nos PAC, especialmente ante os efectos na saúde mental desta crise.

Pola súa banda, a voceira socialista en Chantada, Raquel López, agradeceu a visita do líder do PSdeG á vila, así como a “sensibilidade” que sempre amosou coas necesidades deste municipio lucense.