Gonzalo Caballero na manifestación do 8M: “Tras once anos de desprezos de Feijóo ao feminismo, o goberno progresista na Xunta terá unha axenda de compromiso coa igualdade”

O candidato do PSdeG á Presidencia da Xunta, Gonzalo Caballero, participou hoxe na Coruña na manifestación do 8M, dende onde asegurou que o Goberno progresista que saia das urnas o vindeiro 5 de abril terá “unha axenda de compromiso coa igualdade” despois de “once anos de desprezos de Feijóo ao feminismo”.

“Temos un compromiso coa igualdade real e os dereitos da muller”, recalcou Gonzalo Caballero, quen comprometeu unha consellería de Igualdade, unha rede potente de Centros de información á Muller con máis recursos, máis vivendas para vítimas da violencia machista e iniciativas de loita “clara” contra a fenda salarial.

Sobre todo, sinalou o candidato socialista, porque Feijóo, ao longo destes 11 anos, “desprezou” avances como a lei de igualdade no traballo aprobada polo goberno de Emilio Pérez Touriño, que deixou “metida nun caixón”. “Non houbo nin un só adianto neste eido”, denunciou.

“Feijóo só entende o feminismo como un instrumento electoral”, criticou Gonzalo Caballero, quen censurou a utilización do lema electoral do PP no acto institucional da Xunta por boca da presentadora con motivo do 8M. “Facendo campaña con cartos públicos”, engadiu, sen esquecer que “hai poucos meses, Feijóo dicía que non sabía que era o feminismo”.

Neste escenario, o líder do PSdeG aseverou que “en Galicia é necesario un cambio de goberno” e comprometeuse a “traballar a carón do feminismo para acadalo”.

8M NA CORUÑA

En compañía da alcaldesa, Inés Rey, a quen destacou como “un referente dunha nova xeración de mulleres con impulso para o futuro de Galicia”.

Pola súa banda, a rexedora sinalou que a do feminismo “é unha loita que non empeza nin remata” o 8M e destacou o “orgullo” de encabezar un goberno que loita pola igualdade todos os días do ano.