Gonzalo Caballero destaca a “inversión sen precedentes” do Ministerio de Turismo en rehabilitación do patrimonio histórico galego: “Cumprimos con Galicia”

O líder do PSdeG salienta o plan do executivo central de 25 millóns para rehabilitar 11 bens patrimoniais galegos, logo dunha xuntanza con Reyes Maroto

O secretario xeral do PSdeG, Gonzalo Caballero, destacou hoxe a “inversión sen precedentes” en Galicia anunciada polo Ministerio de Turismo, cunha partida de 25 millóns de euros para a rehabilitación do patrimonio histórico galego.

Así o dixo logo de manter unha xuntanza coa ministra Reyes Maroto tralo acto de presentación do Plan Nacional Turístico Xacobeo 2021-22, que se celebrou esta mañá no Hostal dos Reis Católicos en Santiago.

“Tui, Sarria, Palas, Lérez, Mondoñedo, Xunqueira de Ambía, Herbón, Sobrado dos Monxes, Pontevedra, Lourenzá, Oseira…”, enumerou Caballero para pór en valor os municipios que se verán beneficiados da “importante” inxección económica que o executivo central fará sobre once bens galegos que se atopan en lugares clave do Camiño de Santiago.

Nesta liña, o dirixente socialista destacou que co compromiso do Ministerio de Turismo “por primeira vez” a ruta xacobea contará cun plan “ambicioso” de inversións que o impulsará como “elemento vertebrador e cohesionador” do noso territorio, o que servirá para “potenciar” a oferta turística e “xerar novas oportunidades”.

“Cumprimos con Galicia”, destacou o líder do PSdeG logo de incidir en que esta actuación é un exemplo do “compromiso” do goberno de España con Galicia.

OS INVESTIMENTOS PRINCIPAIS

Ademais, o responsable do socialismo galego resaltou que os investimentos para rehabilitar bens de patrimonio histórico galego chegarán ás catro provincias galegas.

Na provincia de Lugo, reseñou, serán 7,7 millóns de euros para actuacións no Muiño do Toleiro, en Sarria; no mosteiro de Vilar de Donas, en Palas, na catedral de Mondoñedo e no mosteiro de San Salvador de Lourenzá.

No caso da Coruña, os sete millóns de euros de inversión centraranse no convento de Herbón e no de Sobrado dos Monxes.

En Pontevedra, con 5,3 millóns de euros, haberá actuacións no Cárcere Vello de Tui e en dous puntos en na capital de provincia: o mosteiro de San Salvador de Lérez e o convento de San Francisco.

Ademais, na provincia de Ourense rehabilitarase a Colexiata de Santa María, en Xunqueira de Ambía, e o Mosteiro de Oseira.

“Son actuacións importantísimas para a conservación e a posta en valor do noso patrimonio cultural”, valorou o líder do PSdeG, consciente do “compromiso” e da “sensibilidade” do goberno de España con Galicia.

12 MILLÓNS DE EUROS MÁIS

Gonzalo Caballero fixo tamén fincapé na importancia de que estas once intervencións específicas inclúan a aposta por un turismo de calidade en Galicia con outros 12 millóns de euros adicionais.

En concreto, sinalou, destinaranse cinco millóns de euros para apoiar proxectos colaborativos entre destinos asociados aos camiños e que son membros da Rede de Destinos Turísticos Intelixentes, o que beneficiará a Ourense, Santiago, Sanxenxo ou Vilagarcía de Arousa, así como ás deputacións provinciais de Lugo, Ourense e Pontevedra.

Así mesmo, Gonzalo Caballero aludiu aos sete millóns de euros que Turismo investirá en sendos plans de sostenibilidade turística, Ourense Termal e A Mariña Lucense.