Gonzalo Caballero denuncia “dous anos de abandono e ineptitude” de Feijóo no ecuador da lexislatura

Vigo, 25 de setembro de 2018. O secretario xeral do PSdeG, Gonzalo Caballero, fixo este martes un balance da acción da Xunta xusto no ecuador da lexislatura, e concluíu que o tempo transcorrido dende as últimas eleccións autonómicas foron “dous anos de abandono” de Galicia, caracterizados pola “ineptitude” e a “falta de proxecto”.

“A xestión de Feijóo nos deixa fondamente preocupados”, sinalou o líder dos socialistas galegos, baseándose en datos que amosan que “Galicia ten menos posibilidades de futuro” e que existe “falta de atención aos problemas dos galegos e das galegas”.

Ao fío diso, Gonzalo Caballero preguntouse que “tres medidas de Feijóo” pode citar a cidadanía que teñan suposto “un acerto” ou “un avance” . “Se a cidadanía non é capaz de dicir tres medidas positivas, temos a mellor constatación de que hai que pechar o ciclo de goberno de Feijóo e abrir outro de cambio e de progreso”, recalcou.

Pola súa banda, o máximo dirixente do PSdeG fixo fincapé en que, con Feijóo á fronte da Xunta, Galicia “foi a menos, e ten menos oportunidades de futuro para os mozos”. “Non hai proxecto nin xestión”, reprobou.

“COMPROMISOS INCUMPRIDOS”

Así mesmo, Gonzalo Caballero lamentou o “deterioro” dos servizos públicos, o “abandono” do medio rural, o “debilitamento” do tecido produtivo, a “inexistencia” de política económica e industrial, a “desatención” aos sectores máis vulnerables e o “incumprimento” coas infraestruturas.

Non se esqueceu o secretario xeral dos socialistas galegos dos “compromisos incumpridos” por Feijóo en materias tan importantes como a lei dos medios públicos e a loita pola igualdade e contra a violencia de xénero.

“Estivo máis centrado na súa promoción persoal e nas súas dúbidas e especulacións sobre o seu futuro que en atender á realidade dos galegos e as galegas”, criticou, non sen esixir “unha rectificación profunda” de políticas.

Por último, antes de manter unha xuntanza coa comisión de centro do hospital Álvaro Cunqueiro, Gonzalo Caballero incidiu no “suspenso” de Feijóo en materia sanitaria, pois “nin lle interesa nin lle preocupa”.