O secretario xeral critica a nova comparecencia de Conde na comisión de reconstrución decidida “unilateralmente” polo PP e reclama acordar un novo programa de traballo que inclúa “moitos expertos” que non foron admitidos

Santiago, 15 de decembro de 2020. O secretario xeral do PSdeG, Gonzalo Caballero, criticou hoxe “o proxecto baleiro” que presenta a Xunta para tentar obter fondos europeos a través de 108 proxectos que “seguen ocultos” e que “non foron consensuados” coas empresas, cos sindicatos, cos grupos políticos, coas universidades ou coas administracións locais. Por iso, reclamou “transparencia” ao goberno galego, toda vez que ese listado de proxectos nin sequera foi trasladado ao Parlamento.

Así o dixo durante a súa intervención na comisión de reconstrución do Parlamento de Galicia, tras unha nova comparecencia do vicepresidente económico decidida “unilateralmente” o PP logo de deixar fóra “moitos expertos” propostos polo Grupo Socialista e que “poderían contribuír” na tarefa da reactivación do país.

De feito, ao fío disto, Gonzalo Caballero requiriu que se pacte un novo programa de traballo que amplíe a comisión, toda vez que dende o PSdeG “dixemos dende o principio que facía falla máis tempo para poder contar con máis comparecencias”.

Ademais, o máximo líder dos socialistas galegos evidenciou que o feito de que o vicepresidente económico compareza por segunda vez amosa que a Xunta está “sen rumbo nin orientación” sobre a captación de fondos europeos. Por iso, tendeu a man ao goberno galego para “consensuar” as necesidades de Galicia e a estratexia a seguir.

Sobre todo, como dixo, cando as empresas “xa son conscientes de que falar coa Xunta é como non falar con ninguén”, porque nin se coñecen os criterios cos que se seleccionaron os proxectos. Así é que, ante as reclamacións do vicepresidente económico ao goberno de España, Gonzalo Caballero deu a “benvida” á Xunta á “transparencia” e á “cogobernanza” que “nunca exerceron”. É máis, “non houbo nin unha soa chamada de Feijóo despois da súa investidura para abordar a complexa situación que temos por diante”, recordou.

“OPORTUNIDADE HISTÓRICA”

Logo de incidir en que os 108 proxectos dos que falou o vicepresidente son “un resumen sen concreción”, o voceiro parlamentario do PSdeG sinalou que a Xunta non debe formular “como un pulso” a estratexia de obtención de fondos comunitarios.

“Póñanse a remar e a sumar”, urxiu Gonzalo Caballero, consciente de que Galicia ten ante si “unha oportunidade histórica” de obtención de fondos que “non podemos desperdiciar” para acometer a reconstrución de Galicia.

Por iso, demandou unha ponencia específica para abordar a estratexia a seguir, pero rexeitou que a Xunta pida “corresponsabilidade” ante esta “ocultación de información”. Porque, remarcou, “aínda non coñecemos o investimento, os socios, a análise deses 108 proxectos”.