Gonzalo Caballero anuncia os 15 eixos da ponencia marco do PSdeG: “Estamos edificando o mellor socialismo galego para a década dos 20”

O secretario xeral do PSdeG anuncia unha ponencia “inclusiva” que “se vai facer de abaixo arriba coa voz dos militantes”

O dirixente socialista avanza que Alberto Varela, presidente da Fegamp e alcalde de Vilagarcía, e María Barral, vicepresidenta da Fegamp e alcaldesa de Betanzos, “coordinarán” a elaboración do eixe municipalista

O secretario xeral do PSdeG, Gonzalo Caballero, anunciou hoxe os 15 eixos cos que contará a ponencia marco do partido cara ao vindeiro proceso congresual.

“Estamos edificando o mellor socialismo galego para a década dos 20”, sinalou o máximo dirixente das e dos socialistas galegos, despois de destacar que xirará entorno a “catro grandes compromisos: esquerda, feminismo, ecoloxismo e galeguismo-federalismo”.

Así, incidiu en que “fronte a un PP sumido na doutrina conservadora da inacción, na deixadez de funcións, na falla de ambicións e solucións, e fronte a un nacionalismo galego que se quere abrazar á vía Junqueras que non trae nada positivo para Galicia, imos facer un proxecto de país que beneficia aos galegos e galegas, pensado na nosa xente”, sentenciou.

Para iso, sinalou, “imos contar coa participación de diferentes representantes do partido nas distintas Cámaras”, pero tamén “coas aportacións do conxunto da militancia e dos grupos de traballo”, xa que será unha ponencia “inclusiva” que “se vai facer de abaixo arriba coa voz das e dos militantes”.

Nesta liña, Gonzalo Caballero avanzou que o alcalde de Vilagarcía e presidente da Fegamp, Alberto Varela, e a alcaldesa de Betanzos e vicepresidenta da Fegamp, María Barral, serán quen “coordinarán” a elaboración do eixe municipalista.

“15 EIXOS DE TRABALLO”

Por último, o líder do PSdeG enumerou os “15 eixos de traballo” nos que se volcarán os ponentes “para fortalecer, renovar e impulsar a Galicia do futuro que dea oportunidades aos galegos e galegas”:

1. A esquerda para a Galicia do 2030
2. Economía próspera e xusta: modernización e emprego
3. Cohesión social, benestar e servizos públicos:
   • Sanidade
   • Educación
   • Políticas Sociais
4. Federalismo e galeguismo: o avance do autogoberno galego
5. Municipalismo e concellos en Galicia
6. Feminismo e igualdade
7. Compromiso ecoloxista: Galicia Sostible
8. A vertebración do territorio
9. A Galicia rural e o reto demográfico
10. Cultura e lingua
11. O futuro da mocidade
12. Galicia en Europa e no mundo
13. Calidade institucional, xustiza e administración
14. Novos dereitos e liberdades, memoria democrática
15. O modelo do partido: forza da militancia