G. Caballero reclama a Feijóo que se comprometa cos pequenos concellos da Galicia rural para dar igualdade de oportunidades e de servizos á cidadanía

Monterroso, 9 de outubro de 2021. O voceiro parlamentario do PSdeG, Gonzalo Caballero, desprazouse este sábado ata a provincia de Lugo para estar no concello de Monterroso.

En declaracións aos medios, Gonzalo Caballero volveu á reclamarlle á Xunta de Galicia investimentos no medio rural para garantir a igualdade de oportunidades de todos os galegos e galegas á marxe de cal sexa  o lugar onde residan.

Nesta liña, avogou por que todos e todas teñan “servizos públicos en igualdade tanto no que se refire á sanidade ou á educación públicas, como na atención ao nosos maiores”.

Por iso, incidiu en pedirlle a Feijóo “que se comprometa cos pequenos concellos porque non haberá unha reactivación forte en Galicia se a Xunta non fai unha política de vertebración territorial”.

“Queremos”, defendeu, “que o goberno galego aposte polos municipios do rural e queremos que aposte, dende logo, polos concellos da provincia de Lugo, como Monterroso, onde é necesario que a Xunta cumpra en materia de investimentos e servizos  públicos”.

En definitiva, proclamou Gonzalo Caballero, “cómpre que cada galego e cada galega teña os mesmos dereitos independentemente de se vive nunha cidade ou nun concello do rural”.

Con este obxectivo, indicou que “os socialistas seguimos a pé de Galicia, traballando polos galegos e galegas, e dando propostas e respostas aos problemas da cidadanía en cada municipio, en cada bisbarra e en cada recuncho do país”.