Formoso destaca a aposta do IES de Valga pola FP dual e reclama á Xunta a creación do bacharelato de artes para canalizar o talento musical que hai no municipio

O secretario xeral do PSdeG, Valentín González Formoso, destacou a aposta do IES de Valga polo desenvolvemento da FP Dual, que permite a mellor inserción laboral da mocidade acorde coa actividade das empresas galegas.

O número un do PSdeG, acudiu á vila pontevedresa de Valga para escoitar as demandas dos profesores do instituto local. Este é “un paradigma do que vimos reclamando dende hai tempo”, asegurou, o que é que o goberno galego “implemente de forma urxente e decidida un modelo de FP dual máis práctico”.

Isto permitiría “a inserción laboral da nosa xente moza nas empresas galegas con boa formación e máis nivel dos profesionais”. Nesta liña destacou a “aposta do goberno de España” pola primeira lei de Formación Profesional cun investimento de 2.500 millóns de euros.

Unha reforma “revolucionaria” para “avanzar na implementación dun modelo que leva moitos anos funcionando en outros países europeos”.Para Formoso, institutos como o de Valga, son un exemplo do futuro a conquistar pola súa aposta por esta formación, con dúas modalidades que queren incluso ampliar a cinco.

Tras reunirse cos representantes da comunidade educativa, anunciou tamén que levarán ao Parlamento unha reclamación que ten máis dunha década, de que se implemente un bacharelato artístico musical na vila. Buscarán así que se de “recoñecemento ao gran talento musical da súa veciñanza”.

A poboación de Valga está caracterizada por un gran interese e divulgación no ámbito musical, pero os adolescentes que queren formarse neste ámbito teñen que desprazarse un gran número de quilómetros para acudir a clase, contando  con grandes deficiencias engadidas no transporte público.

O secretario xeral do PSdeG acudiu á localidade acompañado da candidata á alcaldía de Valga polo seu partido, María Ferreirós, a voceira da executiva nacional dos socialistas galegos, a pontevedresa María Pierres, e o secretario de Igualdade LGTBI do PSdeG, Javier Carballo de Jesús.